Manglimpyo ta!

Nalipay ko kagahapon nga nakakita sa mga kawani sa barangay Lorega-San Miguel nga mipahigayon og clean-up drive pinaagi sa pagpanilhig ug pagpanglimpyo sa pipila ka bahin sa among barangay.

Pagtuman kini sa kamandoan gikan sa City Hall nga ang mga opisyal sa barangay, ingon man ang mga tagdumala og tunghaan, manglimpyo g'yod sa tagsa-tagsa nila ka palibot.

Ang Coastal Management Board naninguha usab pinaagi sa pagpakigtambayayong sa lainlaing sector aron nga malimpyohan ang kabaybayonan gikan sa mga sagbot.

Samtang nagtan-aw ko sa mga kawani sa among barangay, nakaingon ko nga kini g'yod unta ang kanunay'ng buhaton. Dili kay sila ang manilhig sa mga nataran kon dili sa ubang mga dapit.

Ang akong mga silingan sa barangay Lorega-San Miguel, maoy buhing-saksi nga human nako og panilhig sa palibot sa akong gipuy-an, apilon nako og silhig ang mga sagbot sa karsada.

Apan subo lang kay duna g'yoy ubang tawo nga mga tapolan ug hugawan. Dili manilhig sa ilang nataran ug hinoon, sayo kaayo nga maglingkod bisan og sila walay mga trabaho.

Angkonon nako nga ang barangay Lorega-San Miguel usa sa mga dapit dinhi sa dakbayan nga gubot kaayong tan-awon. Unsaon, inigtangka nimo sa nataran sa kanhi ihawan, makita nimo ang mga sakyanan nga giparada.

Ang mga tag-iya sa maong mga sakyanan wala'y kaikog nga maglisud intawon ang mga moagi sa gamay'ng karsada. Ang tukma unta nga buhaton sa mga opisyal mao nga ila kining badlongon, apan daw sa wala sila makakita.

Didto sa Cebu City National Science High School sa barangay Labangon, nakita nako ang mga ginikanan sa kabataan nga nanglimpyo kagahapon sa lainlaing dapit sa tunghaan.

Dunay mga ginikanan sa mga tinun-an nga nagtungha sa First Year-Venus nga nagtinabangay sa paglimpyo sa classroom. Ingon unta niini ang buhaton bisan makausa na lang sa matag tulo ka buwan.

Ang tunghaan dunay janitor apan dili niini maato ang paglimpyo sa tibuok tunghaan, apil na ang mga classrooms.

Apan ang pagpanglimpyo sa mga karsada sa barangay, angay'ng himoon matag adlaw.

* * *

Pasko na g'yod. Nagsugod na ang mga imbitasyon alang sa mga Christmas party.

Kanunay'ng mag-una ang Globe Telecom sa pagpahigayon og Christmas party sa mga sakop sa media dinhi sa Sugbo.

Sunod mao ang Aboitiz nga mitakda sa ilang Christmas party sa media karong Disyembre 1 adto sa usa ka dakung hotel dinhi sa dakbayan.

Swerte ko nga nalakip sa mga giimbitar sa Aboitiz ug Globe sa ilang Christmas party.

Bisan tuod og dili na kaayo bongga ang ilang party, apan nalingaw gihapon ang mga mitambong niini didto sa usa ka kan-anan sa Banilad Park kaniadtong miaging gabii.

Nahimamat nako pag-usab ang mga opisyal sa Globe nga sila si Sir Jones Campos, Jerry Yntig, Menchie Cruz, Vince Ong, Atty. Mac Gordon ingon man si Jonjie Gonzalez sa JY Gonzalez & Partners.

Nasayod hinoon ko nga ang rason nga wala ko kalimti sa Globe mao nga "die hard" subscriber man g'yod ko nila sukad pa kaniadto. Merry Christmas kaninyo in advance!

* * *

Tan-aw nako, sigurado nga masinati gayod ang grabeng problema sa trapiko kon ipatuman na ang pagsirado sa mga karsada nga maoy agian sa mga delegado sa Asean Summit.

Daghang mga drayber, apil na tingali ko, nga mahasol. Apan labing mahasol kadtong mga magsakay lang unta og jeep kay apektado man kini sa mga rerouting.

Kay sirad-an man ang mga dagkong karsada gikan sa Mandaue Reclamation paingon na sa Marco Polo Plaza Hotel, aw sigurado nga ang tanang sakyanan maghuot sa ubang karsada.