Hipnotismo ug pangilad

Motuo ka ba niining gitawag og hipnotismo? Unsa ba gayod kini? Tinuod ba gayod nga adunay hipnotismo? Usa ba lang kini ka patuo-tuo? O aduna gayod kiniy epekto kun i-apply diha sa atong kinabuhi? Ma-hypnotize ba gayod ang tawo.

Dili pa lang dugay nanukiduki ko bahin niining hipnotismo. Usa man god kini sa gituohan nga gigamit sa modus operandi sa mga mangingilad nga gitawag og Budol-budol Gang. Daghan ang dili motuo niini, ilabi na kun ang teyoriya sa mga tinugyanan sa balaod maoy sundon. Pero ang mga nabiktima nagtuo gayod nga gi-hypnotize sila sa mga suspek nga Budol-budol nga nag-ilad kanila.

Aduna gayod diay hypnotism. Si Rachel Copeland misulat sa librong How To Hypnotize Yourself and Others. Sa maong libro iyang gibutyag nga 10 porsiyento ra sa utok sa tawo ang nagamit matag adlaw. Samtang ang 90 porsiyento niini wala kita mahibawo kun unsay gibuhat. Pero pinaagi sa hipnotismo, magamit na nato ang labing dakong bahin sa atong salabotan.

Gibase kining maong teyoriya sa ekspiremento ni Dr. Ivan Pavlov, ang giilang amahan sa "Conditioned Reflex." Sumala sa pagtuon ang tawo maoy produkto sa atong palibot. Matag kasinatian mobilin og marka sa utok nga daw tape recorder nga puydeng sublion. Mao nga ang kinaiya sa tawo mahimong maestudyohan sa laboratoryo. Ang tawo makahimo pagkontrolar sa mga butang o isigkatawo pinaagi sa hipnotismo, sumala pa sa pagtuon.

Mao nga duna gyod diay hipnotismo. Dili kini anting-anting kondili katakos kini sa tawo sa paggamit sa 90% nga bahin sa iyang utok. Kadtong nabiktima sa Budol-budol posible gyod nga na-hypnotized sa makapalamat nga pasalig sa pribilihiyo nga itanyag sa mga suspek. Sa laing bahin, ang mga suspek sab migamit sa 90% sa ilang utok aron makailad sila sa ilang isigkatawo.

Usa ka texter nga tag-iya sa cellphone number 0920-2180274 mi-text kanako aron pagpaabot sa iyang reklamo bahin sa Minglanilla Public Market administration. Wala kunoy klarong sistema. Mas mahal og ticket ang pagpaninda sa sulod nga bahin kay sa gawas. Pero daghan og kustomer sa gawas. Alkanse ang sa sulod.

* * *

(Sumbong ug reklamo? Text sa 0910-8105522)