Gusbat nga kalinaw

Bisan pa man sa higpit nga siguridad nga gipatuman sa otoridad kalabot sa nagsingabot nga katiguman dinhi sa Sugbo sa Association of Southeast Asian Nations karong Disyembre, wala gihapon mobahar sa ilang binuhatan ang mga badlongon sa katilingban.

Sa niaging mga semana, sunodsunod nga pagpanulis ang nahitabo sa dakbayan sa Sugbo ug dakbayan sa Mandaue. Unang giatake sa mga tulisan ang usa ka lending company nga nahimutang sa Escario Street ug ang sister company niini didto sa barangay Tejero. Kapin sa P100,000 ang nakuha sa mga tulisan sa maong mga insidente.

Ang labing ulahing pagpanulis nahitabo sa opisina sa Visayan Electric Company diin hapit moabot sa P2 milyones ang nasibat sa mga tulisan. Sa akong pagsulat niini, blangko pa gihapon ang kapolisan sa dakbayan sa Mandaue mahitungod sa mga suspek sa maong pagpanulis.

Hinuon, misakay na ang National Bureau of Investigation sa maong kaso ug mihimo na kini karon og kaugalingong imbestigasyon sa insidente. Hinaut nga masulbad ang maong kaso sa daling panahon tungod kay duha na ka ahensiya ang misusi niini.

Apan bisan pa man sa nagkatap nga kapolisan alang sa siguridad sa dakong internasyonal nga katiguman, mora'g wala gihapon mobahar ang mga pagpanulis dinhi sa Metro Cebu. Misamot hinuon paggara ang mga tulisan nga daw mihagit sa otoridad pinaagi sa ilang sunod-sunod nga pagpanulis.

Nagpasabot ba kini nga palpak gayud ang kapolisan sa ilang misyon pagpatuman sa kahusay ug kalinaw sa atong lokalidad? Dili makaingon ang kadagkoan sa kapolisan nga misulbong kining mga pagpanulis gumikan sa kakulang nila og tawo ug kahimanan gumikan kay gatusan na ka pulis ug sundalo ang gipakatap sa Sugbo nunot niining umaabot nga dakong kalihokan.

Daan nang dunay intelligence report ang kapolisan mahitungod sa usa ka armadong grupo gikan sa Mindanao nga buot mosabwag og kagubot dinhi sa Sugbo. Apan unsa may gihimo sa otoridad niini?

Basin mao na kini ang grupo nga responsabli sa mga pagpanulis dinhi sa Sugbo ug nga minus gayod sa kapabilidad ang kapolisan pagsumpo niini bisan pa man sa daghang reinforcement nga gipakatap karon.

Kon padayon nga dili masumpo kining mga pagpanulis, kuyaw nga yam-iran ang Sugbo sa internasyonal nga komunidad tungod sa nagkagusbat niining sitwasyon sa kahusay ug kalinaw. Unsa kahay impresyon sa mga delegado sa ASEAN Summit ug sa internasyonal nga medya sa Sugbo nga salag na karon sa mga tulisan ug uban pang dautang elemento?

Ang Sugbo ra gihapon ang alaot kon dili gayud masumpo ang nagkadaiyang krimen nga nanghitabo karon sa atong palibot. Kini tungod kay nagpasabot kini nga dili na makontrolar sa otoridad ang mga pagpanulis, pagpatay ug uban pang dautang binuhatan nga ordinaryo nang nanghitabo sa atong lugar.

Samtang kusog karon ang promosyon sa Sugbo isip usa sa mga nag-unang lugar sa Pilipinas alang sa mga langyaw'ng turista, pildi usab ang kagamhanan sa kampanya niini batok sa kriminalidad. Ug kinsa pa bay turista ang gusto motaak sa Sugbo kon magpadayon kini?

Dili ikalimod sa atong kapolisan nga dako usab silag pagkulang sa ilang pagpatuman sa kahapsay ug kalinaw sa atong lokalidad. Ug kini ang hinungdan ngano nga ang Sugbo maoy usa sa mga lugar sa nasud diin dunay taas nga crime rate.

Sa akong tan-aw, dili gayud magsilbi ang dakong reinforcement nga gipakatap karon pagtabang sa kampanya sa otoridad batok sa kriminalidad kon walay pagpanghingusog sa kampanya batok niadtong mga bugok sa katilingban nga grabe'ng misiaw karon.

* * *

Ipadala inyong reaksiyon sa [email protected]