Praktis sa mga kriminal?

Subling miatake ang mga tulisan dinhi sa dakbayan sa Sugbo niadtong Sabado. Duha ka mga financing institutions ang hapit dungana og tulis sa gituohang usa ra ka grupo sa mga tulisan.

Unang gitulis sa duha ka wa pa mailhing mga tulisan ang Alano and Sons Finance Corporation diha sa may dalan Escario. Wa pa ganing kaabot ang miresponding mga polis laing alarma sa tulis ang ilang nadawat didto sa T. Padilla ang G.A. Countryside Finance Corporation nga matud pa gipanag-iya ra sab sa anak sa tag-iya sa unang lending firm nga gitulis.

Ang mahulagway nga back-to-back nga insidente sa pagpanulis niadtong Sabado taliwa sa hugot nga siguridad nga gipatuman sa kapolisan isip kabahin sab sa pagpangandam sa ASEAN summit kadudahan ug angayang paladman pa ang imbistigasyon.

Una mao nga sa kadako sa maong lending firm kwestiyonable ang kapakyas niini pagbaton og mga security guards. Ikaduha, sulagma ba lang nga usa lang ka pamilya ang nanag-iya sa duha ka mga establishamento nga gitulis? Ikatulo, mao ang kapakyas sa mga empleyado pagtawag dayon sa atensiyon sa mga polis nga diha sa duol sa ilang buhatan.

Matud sa report nga wa gyud masayod ang mga polis nga diha duol sa Alano and Sons sa Escario nga dunay tulis tungod kay inay nga mangayo'g panabang ang mga kawani nanirado man hinoon ni human sa tulis.

Kon tinuod nga duna gyuy nahitabong pagpanulis seryoso ang implikasyon niini alang sa umaabot nga ASEAN summit. Kini tungod kay taliwa sa grabing police visibility ug sa mga bag-ong sakyanan nga giapod apod karon ngadto sa kapolisan napakyas gihapon sila paggukod sa mga responsabli.

Wa kaha nga samtang nagbansay bansay ang mga awtoridad alang sa ASEAN summit ang mga kriminal naghimo pod sa ilang kaugalingong pagbansay bansay unsaon pagpakauwaw ang atong gobyerno atol unya sa maong dakong kalihukan?

Posibling ang mga tulis nga ilang gihimo kabahin ni sa ilang pagbansay-bansay. Kon simbako husto ang akong pagduda, angayang doblihon sa kapolisan ang ilang lihok kay sa akong tan-aw epektibo ang mga kriminal sa ilang praktis.

Tiaw mo bay suma pa sa report sa radyo nga nagsalimuang kuno ang kapolisan unsay ilang unahon og respondi niadtong Sabado kay wa pa gani silang kaabot sa unang alarma laing tawag nasab ang ilang dawat.

Kini maoy angayang tun-an sa atong kapolisan og unsaon pagtubag ang ingon niini nga mga sitwasyon. Kon imong tan-awon di nang karason ang kapolisan nga kuwang sila og tawo o ba kaha wa silay sakyanan tungod kay labihan na kadaghan sa mga polis nga nia sa Sugbo ug hapit tanan bag-o ang ilang mga sakyanan.

Husto na ang gidaghanon sa kapolisan nga nia sa dakbayan sa pagkakaron, gani kon imong tan-awon hapit tanang eskina sa dakbayan dunay mga polis nga nagbarug. Di na sab silang kalusot nga lisod maapsan ang mga kriminal kay nagsakay og motorsiklo tungod kay bag-o kaayo silag mga sakyanan.

Gawas sa Toyota Altis nga gihatag sa Kampo Crame duna pay mga bag-ong Toyota Innova nga gihatag sa dakbayan sa Sugbo, wa niy labot sa unang mga patrol cars. Busa kon husto lang ang lihok sa atong kapolisan way rason nga di gyud nila madakpan ang mga mohimo og kagubot ug bisan unsang matang sa krimin dinhi sa dakbayan sa pagkakaron.

Ang ilang kapakyas pagdakop sa mga tulisan kon tinuod man nga dunay tulis, nagpasabot nga kuwang pa ang ilang lihok ug kinahanglan pang dugangan kay hitsas na sila sa kahimanan ug sa gidaghanon sa mga sakop.

* * *

E-mail: [email protected]