EDITORYAL — Mga dispatser na sad

Nagpadayon ang reklamo nga atong madawat bahin sa mga dispatser nga nagpadayon usab sa pagsamok-samok sa kadalanan diin nangharas kini sa mga drayber sa PUJ ug usahay taxi.

Duna naman untay ordinansa batok niining mga dispatser apan gisalikway kini ug gipasagdan ra sad sa mga polis ang maong pagsalikway sa ordinansa.

Nia sa downtown area sa siyudad sa Sugbo mag-operate kining maong mga dispatser diin ilang gipangharas ang mga PUJ drayber pinaagi sa pagpangayog kuwarta bisan way pasahero silang mapasakay sa sakyanan sa ilang gipangayoan.

"Kon duna man gani sila mapasakay bisan usa lang ka pasahero, doble na ang kantidad nga ilang pangayoan," suma pa sa usa ka drayber.

"Mga tigas ra ba ning mga dispatser," puno pa sa drayber nga atong nakahinabi. "Mapugos ra tag hatag ngadto kanila kay kuyaw man nga ila tang dumtan, daghan ra ba ni sila."

Ambot kon sayud ba niini ang mga Citom traffic enforcer. Hinaut unta nga ila kining susihon ang mga reklamo sa atong mga PUJ drayber ug hatagag aksyon kay naa may balaod nga ilang kabasihan ang maong aksyon.