Ang Pilipino propesyonal

Gina-ingon sa mga surveys nga ang mga Pilipino usa sa mga labing edukado nga mga tawo dinhi sa kalibutan. Taas ang atong literacy rate ug daghan kitag mga gradwado sa kolehiyo. Ang atong mga mamumuo gikinahanglan nga mga gradwado sa high school o sa kolehiyo usa pa kini dawaton sa trabaho. Bisan didto sa mga lagyong barangay aduna nay mga barangay high school, nga maoy hinungdan nga ang atong mga kaigsuonan sa lagyong dapit mahimo nang makatiwas sa high school bisan dili na moadto sa lungsod o moari diri sa siyudad. Tingali bisan tungod nalang niini, ato usab pasalamatan ang gobyerno sa paghatag kanato og libre o barato nga edukasyon. Hinuon, adunay mga pangutana kon igo na ba ang nakat-onan sa atong mga gradwado alang sa panarbaho dili lang dinhi sa atua kondili hasta usab sa laing mga nasud.

Tungod kay daghan kitag mga edukado ug propesyonal, daghan usab unta kitag kahigayonan nga makatabang sa atong nasud ug sa atong ekonomiya. Kanang gitawag og "brain drain" morag dili na angay nga kahadlokan, tungod kay kada tuig, libo ka libo ang mo-gradwar sa kolehiyo dinhi sa ato, nga puros potensyal nga moabag sa atong ekonomikanhong kaugmaon. Tinuod gayud nga ang labing dakong bahandi sa atong nasud mao ang atong mga kaigsoonang Pilipino ra usab.

Tan-awa pananglit ang Pilipino nga nars. Pinili siya sa lain-laing lugar sa kalibutan. Mas maayo kuno ang work ethic o batasan sa panarbaho sa Pilipino nga nars. Mas maayo moatiman sa pasyente ug mas daling saligan sa mga langyaw nga doktor. Pila ka libong pamilya ang nabuhi sa mga Pilipinong narses nga mikita ug dagkong sweldo didto sa laing nasud? Pila ka milyon ka dolyares ang misulod sa atong nasud gumikan sa atong mga narses, nga maoy usa sa nakapabuhi sa atong ekonomiya?

Tan-awa ang atong mga seafarers kon seaman. Pila ka pamilya ang nabuhi gumikan kanila? Kon anaay mga arang-arang nga mga panimalay didto sa probinsya, hayan nga ang tag-iya usa ka seaman. Gina-ingon nga upat nalang kuno ka klaseng tawo ang mga nanag-iya og mga nindot nga balay karon: mga BSN (binuhi sa nars), BSS (binuhi sa seaman) BSF (binuhi sa foreigner) ug BSK (binuhi sa kurakot). Morag komedya, mora sag tinuod, di ba?

Apan sa samang higayon, atong makita nga kining maong potensyal nga bahandi wala nato atimana pag-ayo aron mosidlak pa gayud pag-ayo. Kulang gihapon ang atong mga scholarships. Kulang gihapon ang atong mga kahimanan sa eskuylahan aron mopalambo sa ilang kahibalo. Kulang pa gihapon kita og pag-giya kanila. Pananglitan, ang usa ka gradwado sa kolehiyo o high school, igo na ba ang edukasyon nga iyang nakuha aron siya makatrabaho ug magmapuslanon? Makadaghan ako makasugat og mga gradwado sa kolehiyo nga dili gyud intawon masabtan ang iningles. Sa atong mga gradwado karon, pipila lang ka buok ang makamaong mo-multiply o divide nga dili ginamit ang calculator.

Ang tinuod, daghang mga gradwado sa kolehiyo nga lupigon lang sa kahibalo sa mga estudyante sa high school diha sa Philippine Science High. Tungod kini kay ang maong mga estudyante giayo man pagtudlo ug pag-giya, gihatagan man sa insaktong kahimanan alang sa ilang pagtuon. Ug busa inig gradwar niini nila, dako-dakong porsento nga makasulod silag trabaho nga maayo ang sweldo, ug bisan pa sa mga laing dapit sa kalibutan.

Aduna kuno'y daghan nga trabaho nga gihatag niining mga call centers. Gani, wala'y gipili nga kurso dinhi. Apan ngano man nga sa kadaghan sa atong mga gradwado, gamay ra may makasulod sa maong trabaho? Tungod kini kay ang ato kunong iningles dili madawat sa ubang dapit sa kalibutan. Pwerte natong panghambog nga maayo kitang laki nga mo-iningles, apan karong panahona, mas maayo nang mo-iningles kanato ang taga-India. Bisan nagpabilin nga gigamit ang ilang nasudnong pinulongan, nagka-maayong mo-iningles na sad ang mga taga Korea , taga Japan , Malaysia , Indonesia ug Singapore .

Ang Pilipinong propesyonal adunay dakong kahigayonan nga mosidlak sa bisan asang dapit sa kalibutan. Kinahanglan lang silang i-diskobre, i-polish. Labaw sa tanan, kinahanglan nga kita mismo maghatag og balor sa atong tinuod nga potensyal, aron dili nato kini pasagdan, dili kini nato usik-usikan.

* * *

Alang sa inyong mga panahom ug reaksyon, palihug e-mail sa [email protected] o text sa 0195-5536986. Daghang salamat.