Dili angay tuohan

Kon modus operandi na gani sa mga badlongon sa katilingban maoy hisgotan, usa sa midagsang pag-ayo karon mao ang text scam. Daghan na ang hapit mabiktima niini. Daghan na pod ang nabiktima na gyod niini, ilabi na kadtong dali ra kaayong motingkag ang dalunggan kon kuwarta nay hisgotan.

Usa ka magbabasa niining kolum mi-text kanako nga nagkanayon: "Nakadawat kog message nga nakadaog kuno ko og P600,000.00 ug Nokia nga 6630 from New PAGCOR, DTI permit no. 0493. Ang nag-text mao si Atty. CCD (inisyal). His number is 0926-3516322. Angay ba ning tuohan?" -- 0926-3510773 (Aug. 17, 2006 -- 09:35:18)

Ang akong ikasulti mao nga dili angay tuohan ang nadawat nimong text message. Kon tinuod nga ang New Pagcor (man kaha) ang nagpasiugda sa promo, seguradong ang pagpahibalo kanimo nga nakadaog ka dili ipaagi sa text message sa usa ka partikular nga cellphone number kondili pinaagi sa usa ka designated number o ba kaha pinaagi sa notisya sa telegrama o sulat nga ipaagi sa koreyo.

Mao nga hugot ang akong pagtuo nga walay kasayoran ug kalabotan ang New Pagcor niining text nga imong nadawat. Binuhatan lang kini nianang usa ka Atty. CCD (ambot kon tinuod ba usab kini nga ngalan) nga buot lang manapi alang sa pagpaburot sa kaugalingon niyang bolsa. Mao nga dili gayod kini angay tuohan. Hinumdomi kanunay nga lisod ug imposible ang pagdaog usa ka promo nga wala nimo apili.

Ug alang sa tanang mga magbabasa, bantayi ninyo kining cellphone number 0926-3516322 nga gipanag-iya sa usa ka Atty. CCD kay basin kamo na usab ang sunod padad-an og congratulatory message niini. Ayaw ninyo hatagig bug-at nga pagtagad ang unsa man nga text message nga inyong madawat gikan sa maong numero aron pagseguro nga dili gayod kamo mailad.

Ang bisan unsa man nga text nga inyong madawat nga magpahibalo nga nakadaog kamo sa electronic raffle draw nga gipahigayon sa mga charity foundation ug sa mga buhatan nga gipanag-iya sa atong kagamhanan, dili gayod ninyo angay tuohan kay ang ngalan niining maong mga buhatan ug institusyon gigamit lang sa mga badlongon sa katilingban alang sa ilang modus operandi.

(Sumbong ug reklamo? Text sa 0910-8105522)