EDITORYAL — Pacaña vs. overnight parking

Usa ka opisyal sa dakbayan ang misaad nga iyang pahunongon kining overnight parking sa daplin sa kadalanan sa siyudad. Wala kini matuman.

Karon si Konsehal Arsenio Pacaña nasad ang miawhag sa City Traffic Operations Management (CITOM) sa pagpatuman sa ordinansa diin gidili kining overnight parking.

Ang ordinansa mao kining City Ordinance No. 356 nga giulohan og "An ordinance regulating the parking of trucks, cars, tartanillas, pushcarts, and other kinds of vehicles on any street in the city of Cebu."

Matud ni Konsehal Pacaña ang overnight parking nakabalda sa dagan sa mga truck sa bombero atol sa sunog tungod kay ang gamay nga kalsada misamot ka gamay gumikan sa mga sakyanan nga giparking daplin sa maong dan.

Dugay na kaayo kining problemaha ug makadaghan nang misaad ang City Hall nga ilang sulbaron kini apan nagpabilin ang maong suliran tungod kay kadaghanan niining mga tag-iya og sakyanan nga way grahian gipaluyohan man sa mga politiko.

Manghinaut kita nga magmalampuson si Konsehal Pacaña sa iyang tinguha nga masulbad na gayud kining problemaha.