Pagmatngon gyod

Ang kamandoan sa Bangko Sentral ng Pilipinas pagpatak-op sa Bank of Cebu sugod kagahapon, magmatuod lang nga angay kita nga magmatngon sa mga bangko nga atong depositohan sa atong kwarta.

Tinuod, dunay Philippine Deposit Insurance Corporation nga andam mobayad ngadto sa mga depositors sa higayon nga mabangkarota ang mga bangko, apan ang kantidad nga ilang bayran kutob ra sa P250,000.

Kon duna pa'y daghang kabtangan ang mga bangko nga nabangkarota, mahimo kining mabaligya aron ang halin ikabayad sa mga dagkong depositors. Kon wala, manghilak na lang ang mga depositors.

Bisan pa og ang atong deposito mabayran sa PDIC kay ubos ra ang kantidad sa P250,000 nga insurance coverage, apan hasol gihapon kaayo kay mahimong malangan man ang pagbinayranay ngadto sa mga depositors.

Ang Bank of Cebu, dunay 7,870 ka accounts sa pito niini ka bangko dinhi sa Sugbo, apil na sa Lapu-Lapu, Mandaue ug Talisay. Sa maong gidaghanon, 167 lang ang dunay mga deposito nga ang kantidad misubra sa insurance coverage.

Alang sa mga depositors, basin sa sunod semana mabayran na kamo sa kantidad nga inyong gideposito. Ang pait lang kon ang kwarta gamitonon kaayo pagka karon, pait.

Duha g'yod ka kaso ang hukman ni RTC judge Ireneo Lee Gako Jr. sa dili pa siya moretiro sa aktibong serbisyo unya sa Septembre 20. Ang mga kaso nga murder naglambigit og duha ka polis.

Ang kaso batok ni SPO1 Marcial Ocampo nga gipasanginlang mipusil ug mipatay ni Bantay Dagat project director Elpidio "Jojo" dela Victoria gikatakda na nga hukman unya sa Septembre 18.

Inigka-ugma, Septembre 19, ang hukman ni Gako mao na usab ang kasong murder nga gipasaka batok ni SPO4 ug karon Inspector na nga si Juanito Pajantoy, kinsa gitumbok nga maoy nakapatay sa kauban niyang polis - si PO3 Michael Sarcol.

Daghang mga kaso nga gitakda nga hukman ni judge Gako nga dili mahinayon kay dugay niyang mahuman ang mga disisyon. Apan sigurado ko nga dili kini mahitabo sa mga kaso nila ni Ocampo ug Pajantoy.

Una nga rason mao nga moretiro na si judge Gako pagka petsa 20. Kon dili niya i-promulgate ang disisyon sa dili pa siya moretiro, ang mopuli kaniya nga huwes dili mahimong mo-promulgate sa gihimo niyang disisyon.

Nagpasabot nga malangan ang paghuman sa maong kaso kay ang bag-ong huwes motoon pa man sa merito sa kaso. Mao nga nagtoo g'yod ko nga dayonon ni judge Gako ang pag-promulgate sa hukom sa duha ka kaso.

* * *

Ang nahitabo ni prosecutor Rosendo Brillantes nga gihukmang sad-an ug mabilanggo og 18 ka tuig tungod sa pagkahanaw sa 248 gramos nga shabu nga ebidensya sa usa ka kaso, angay'ng kuhaan og pagtulon-an sa ubang fiscal.

Nasayod ko nga duna pa gihapo'y mga fiscal nga hangtud karon dili motugyan sa mga ebidensya ngadto sa ilang evidence custodian, kay ang uban ganahan kaayo nga sila ang motipig - ilabi na og mga nindot nga armas.

Unsa man, ingnon ko ninyo nga namakak? Maayo g'yod nga dunay pagahimoong imbintaryo sa mga ebidensya nga anaa gitipigan sa property custodian sa piskaliya aron masuta kon wala bay nangahanaw.

Unsay ikasulti nimo niini city prosecutor Nicolas Sellon? Dili ka motoo sa akong gisulti?