Reklamo batok videokehan

Niining bahina sa akong lindog, akong hatagan og pagtagad kining reklamo sa usa ka magbabasa diha sa Nangka, Consolacion. Duna siyay reklamo mahitungod sa videokehan sa ilang dapit nga walay hugonhugon nga magsaba-saba panahon sa kagabhion nga makatugaw sa pagkatulog sa mga lumolupyo.

Aron inyong masabtan pag-ayo, akong ipatik ang katibuk-an sa iyang text nga nagkanayon: "Maayong adlaw. Kami diri sa V and G Subdivision, Nangka, Consolacion atbang sa New Public Market natugaw kay daghan kaayong videokehan diri. Dis oras na sige gihapon sila og videoke. Mao kiniy nakahasol namo diri kay dili mi makatulog og insakto kay pakusgan man nila ang volume sa ilang mga videokehan. Wa gyod silay kaikog sa mga tawo nga nangatulog na. Matugaw ang among pagkatulog tungod sa kasaba, sa may atbang sa merkado." -- 0910-7648560 (July 24, 2006--11:02:44)

Wala kaayo ko masuheto dihang dapita sa Nangka, Consolacion mao nga dili lang una ko mokomentaryo mahitungod niining maong reklamo. Dili man god nako sinati ang sitwasyon sa maong lugar. Ang ako lang ikasulti mao nga maayo tingali nga i-regulate lang ang operasyon sa mga videokehan diha. Kon dili man mahimo nga limitahan sila sa oras sa ilang pagpangabli ug pagsera, basin mahimong limitahan ang kakusog sa sounds nila aron dili makadisturbo sa mga silingan nga nangatulog. Dili man tingali dako kining maong hangyo alang niadtong nanag-iya og videokehan sa nahisgotang dapit.

Alang sa atong reklamante, mas maayo tingali nga idangop ninyo ngadto sa mga barangay opisyal sa Nangka, Consolacion ang mao ninyong reklamo aron mahimoan kinig tukma ug pormal nga lakang aron masulbad ang problema nga walay kabubut-on nga masilo. Nagtuo kong mamati sila sa inyong mga yangungo ug makasabot sila sa inyong mga reklamo, ilabi na gayod ang barangay kapitan sa maong lugar.

Tinuod bitaw nga makatugaw gayod kanang videoke ilabi na kon walay kaikog ang mag-operate niini. Angay gayod kining i-regulate. Nakasabot kitang negosyo kana nila, pero dili sab maayo nga makahasol sa uban ang maong negosyo.

* * *

(Sumbong ug reklamo? Text sa 0910-8105522)