Hutdanay

Lain na usab nga miyembro sa Akrho ang gipatay ug nasamdan dinhi sa dakbayan sa Sugbo kaniadtong Martes atol gayod sa ilang anibersaryo. Ang duha taga lungsod sa Balamban nga miapil sa kalihukan sa anibersaryo sa Akrho. Ang nasamdan usa ka minor de edad kinsa nakuhaan og nilikit nga marijuana ug kutsilyo sa atong kapulisan nga miresponde sa maong hitabo.

Sa gihapon ang karibal nga Tau Gamma maoy gidudahan sa uban nga maoy naghimo sa krimin ug tungod niini ato na usab nga mapaabot nga sa sunod mga takna ug adlaw aduna na usay miyembro sa karibal nga grupo ang tumbahon.

Aduna pa kahay paglurang kining pinatyanay, binunalay, binugbugay ug dinunggabay nga gihimo sa managribal nga grupo, ang Akrho ug Tau? Tan-aw nako morag layo na kaayo sa tinuod ang posibilidad nga mahilot pa kining bangi sa managkaribal nga grupo tungod sa garbo ug kadugayon na sa maong bangi.

Tungod sa kadugayon na sa panagbangi sa duha ka grupo, ubay-ubay na sa ilang mga ka bro ang nangamatay ug nangapagan sa kasal-anan sa ilang mga kaubanan nga mao kini ang hinungdan kon nganong ang matag usa ka grupo gusto gayod nga makabawos. Gumikan usab sa garbo, gisalindot na sa duha ka grupo ang panag igsoonay ug kalinaw.

Mao kini ang hinungdan kon nganong nagpadaghanay og miyembro nga mga istambay ang duha ka grupo nga maoy ilang gihimong warrior. Hutdanay sa ilang mga ka bro ang gipatuman nga patakaran sa Akrho ug Tau. Ug kay ila mang gipaabot ang pinatyanay mao seguro kini ang hinungdan kon nganong ang regional nga opisyal sa Akhro nga si Richard Buscayno nagnegosyo og purinarya?

Sa mga miyembro sa Akrho ayaw na mog kabalaka kay aduna nay giandam kaninyo nga lungon si Richard Buscayno sa iyang purinarya? Ambot lang kaha sa Tau. Labing seguro aduna na pod ni silay gikontak nga purinarya nga maoy mohikotar sa ilang miyembro nga matumba, kana kon wa pod sila magpadagan og purinarya. Ug sa mga ginikanan ning mga miyembro sa duha ka grupo, ang inyong problema morag ang yuta na lamang sa sam-ang diin adto sila ninyo mapahimutang. Kon inyong masayran nga miyembro sa Akrho ug Tau ang inyong anak pagpareserba na lang mong daan ug pila ka metros kwadrado sa yuta sa sam-ang aron dili mo maunhan sa uban nga mga ginikanan.