EDITORYAL — Atrasado ra ta nilihok

Ubay-ubay pa sa mga Overseas Filipino Workers (OFWs) ang tua sa Lebanon diin namilegro pa ang kinabuhi tungod kay nagkalisud na ang ilang pag-ikyas sa maong nasud.

Naninguha ang kagamhanan nga makakitag paagi nga mapapauli sa Pilipinas ang maong mga OFWs apan sa pagsuwat niini wala pa gihapoy klaro kun makalingkawas ba ang mao tang kaigsuonan.

Manghinaut kita nga makalingkawas sila sa dakong katalagman ug makabalik sa ilang mga pamilya sa dili madugay.

Kining problema nga giatubang karon sa pipila ka mga OFWS nga nahibilin pa sa Lebanon wala unta mahitabo kun gisayo lang ang pagpa-evacuate sa atong mga kababayan didto sa Lebanon.

Sa una pang pagbuto sa bomba sa Israeli gipapauli na unta dayon ang tanang OFWS nga atua manarbaho sa Lebanon. Ug ang mga OFWs mismo unta maoy naninguha nga nakapauli gilayon. Samtang may panahon pa. Nalambigit ba niini ang Filipino time?