Way kapilian

Ang Kuwait maoy labing pait nga destinasyon alang sa domestic helpers. Matud sa mga representante sa placement agencies nga nakatambong sa Kapamilya Media Forum sa DYAB Abante Bisaya ug Sky Cable padayong nisaka ang mga kaso sa pagpanlugos ug ubang pangabuso batok sa OFWs labi na gyod sa domestic helpers sa Kuwait. Sa pikas nga bahin, gipasidunggan nila ang Jordan. Kay gawas nga matinud-anong gipatigbabaw ang mga kontrata sa OFWs, ang mga domestic helpers hatagan pa gyod og higayon nga makapauli sa ilang mga pamilya sa Sugbo ug ubang bahin sa Pilipinas matag unom ka buwan.

Sa wa pa moulbong gubat, ang Lebanon usa sab sa labing nagpangga sa OFWs. Matud ni Victor Cogal, presidente sa Cebu Association of Recruitment Agencies, ang nahitabo ni Noemi Prestoza, ang OFW nga taga Lapu-Lapu City nga nipasangil nga gidagmalan siya sa babaye ug katulo gisuwayan paglugos sa lalaking employer, maoy labing una nga ilang nabatian nga pangabuso sa Lebanon.

* * *

Si Evelia Durato sa Philippine Overseas Employment Administration (POEA) sa Kabisay-an, kinsa dinapit sab sa sinemanang media forum sa SM City Cebu, niangkon nga limitado ang mahimo sa kagamhanan ug sa placement agencies pagtabang sa OFWs nga gidaugdaog kay ang mga balaod sa Pilipinas di na mapahamtang sa ubang kanasuran. Si Durato dunay duha ka sugyot aron mas kapanalipdan ang katungod sa OFWs sa nagkalainlaing kanasuran, labi na sa tungatungang sidlakan:

o Pagsud sa kagamhanan sa Pilipinas og bilateral agreements uban sa mga nasud nga gikaintapang nagpabaya sa pagsilot sa ilang nationals nga nangabuso sa OFWs; ug

o Paghunong lang una sa pagpada og domestic helpers ngadto sa pipila ka mga nasud nga dunay nagsulbong nga mga kaso sa pagpahimus sa pagdagmal, pagpanamastamas, pagtanggong ug pagsakmit sa mga pasaporte ug travel documents sa OFWs.

* * *

Ang labing maayo gyod untang hulagway mao nga ang pagpanarbaho sa ubang kanasuran mahimong usa na lang sa kapilian sa mga mamumuo. Apan niangkon si Direktor Wilfreda Misterio sa Overseas Workers Welfare Administration (OWWA 7) nga way katakos ang nasudnong ekonomiya sa pagsuyop sa gibanabanang walo na ka milyon ka OFWs sa nagkalainlaing bahin sa kalibotan. Matud niya maglisod na man gani ang kagamhanan ug lokal nga mga kompaniya paghatag og panginabuhi kon manguli ang tanang 34,000 ka OFWs gikan sa Lebanon.

Ang OFWs, segun ni Fidel Magno, ang Labor Employment Officer sa Dakbayan sa Sugbo, maglisod na sab pagpaubos sa ilang mga panginahanglan. Kay nakasuway na man sa dagkong suholan sa ubang kanasuran, maglisod na pag-agwanta sa ubos nga suholan dinhi sa ato. Maong gawas sa pagtanyag og mga kahigayonan sa panarbaho pinaagi sa job fairs, ang nagkalainlaing mga ahensiya nanudlo na sa namalik nga OFWs ug ubang way trabaho sa pagsugod sa ilang kaugalingong negosyo.

* * *

Email: [email protected]