Adlaw sa panudya

Dihang gipahibawo ko sa usa ka dakong opisyal sa Mactan-Cebu International Airport Authority (MCIAA) nga natangtang na si General Manager Adelberto Yap, wa ko motuo. Gipakaingon nako nga iya lang kong gisungog, o ang opisyal nangandoy lang sab og kausaban sa liderato sa tugpahanan, kay nahibawo man siya unsa ko kakusganon nga nikuwestiyon sa pagpamugos ni Yap pagpabilin sa katungdanan. Apan dihang uban nakong mga higala nidason sa pahibawo, gipakaingon nako nga wa nang kaagwanta si Yap ug nibiya na lang sa MCIAA.

Sakto ko sa akong panagana. Wa matangtang si Yap, igo lang gisuspenso. Bisan hanap nang makabalik siya sa katungdanan, apan wa siya palagpota sa mga sakop sa MCIAA board. Apan sayop ko sa pagtuo nga madutlan pa og uwaw si Yap. Wa pa ko kahibawo unsay nahitabo sa tigom sa MCIAA board apan nahadlok kong hangtod sa kataposang gutlo nisuway si Yap pagpilit morag kumi sa buhatan nga, mas nahadlok ko, morag andam niyang pakamatyan.

* * *

Bisan sa pagpasabot nako sa usa ka kongresista nga sa tanang tagduma sa MCIAA si Yap ang alang niya labing takos-kay isip heneral dunay lapad nga kasinatian sa management, isip piloto dunay kahibawo sa mga ayroplano ug sa industriya ug isip luyoluyong kalihim sa DOTC nasuhito na sa burukrasya sa nasudnong kagamhanan-wa ko batia og bisan gamay na lang kahinugon ni Yap:

• Una, ang pagkuwestiyon sa CSC sa iyang kahaom sa katungdanan, human napakyas pagpasar sa yanong pasulit sa civil service eligibility, nakaangkon og sukaranan sa daghan ug dagkong bulilyaso ni Yap nga nakapakumbinser sa MCIAA board pag-imbestigar ug pagsuspenso niya;

• Ikaduha, di angay'ng hilakan ang pagkapukan sa opisyal nga nigamit sa iyang gahom paghasi, paggukod ug paglisudlisod sa mga tawong giisip nga hulga sa iyang paghawod sa tugpahanan; ug

• Ikatulo, nalipay ko nga makaangkon na gyod og hustisya ang mga opisyal ug mga kawani sa MCIAA nga di makiangayon gipanangtang ug gipanglabay ni Yap sa lagyong mga dapit ug gihikawan sa ilang mga suholan.

* * *

Ang pagkatangtang ni Yap nakamatuod sab sa makausa pa nga sakto si Jerry Tundag, ang editor sa The Freeman, sa iyang paghulagway ni Gobernador Gwen Garcia nga "babayeng dunay itlog." Labaw sa lalaking mga sakop sa MCIAA board, si Garcia ray nakaangkon og kaisog sa pagbisto, pagbadlong, pagpa-imbestigar ug pagpasuspenso ni Yap atubangan sa nagbuntaog nga mga pasangil sa kahiwian batok sa opisyal nga ila untang giduphan gikan sa CSC ug ubang kihante.

Bisan unsa pay motibo ni Garcia, iyang nabanhaw ang pagsalig sa mga Sugbuanon nga di tanang mga sakop sa MCIAA board mga robot nga way buot nga magyanguyango lang bisan sa binuang nga ipaslak sa mapahimuslanong mga pundok sa ilang tutonlan.

* * *

Email: [email protected]