Scoop ni Gloria

Ug sa kataposan, nagkasulti na gyod mi ni Presidente Arroyo. Niuyon siyang isal-ot ko sa iyang gitambongan nga birthday party ni Danao City Mayor Ramonito Durano III sa Hilton Hotel sa Mactan gikan sa alas-8 ngadto sa alas-8:30 niadtong Biyernes sa gabii.

Dihang gipahibawo ko ni Ramil Paican, ang deskman sa TV Patrol Central Visayas, sa kasayuran nga iyang nakuha gikan ni Fayette Riñen sa Philippine Information Agency (PIA), ang una nakong reaksiyon mao nga uwahi nang tanan.

Kay Lunes pang sunod namong balita ug mabahaw nang bisan unsang kasayuran nga akong makuha gikan sa presidente. Gawas nga dako ang kahigayonan nga magpaabot na sab ko hangtod sa tungang gabii. Nakalimot ko nga sa ABS-CBN di ang akong gusto maoy matuman.

* * *

Pagkahibawo sa ABS-CBN Manila nga magpa-interview ang presidente, gisugo ko sa desk sa ANC ug Channel 2 nga ipa-uplink pinaagi sa satellite ang video recording pagkahuman gyod dayon sa interview. Gilitaniyahan na sab ko nila sa kaliboan ug usa ka pangutana nga ipasupot ngadto sa presidente.

Apan unsaon na man lang ang akong date? Nagsabot mi sa akong asawa nga manihapon sa usa ka Japanese restaurant human sa akong trabaho. Maong nangilaba kong Fayette mahimo bang iuswag ang interview ngadto sa alas-8:30 aron di intawon kaayo madalidali ang pagkalabera sa ulo sa dakong isda sa Nonki?

Nakalimot na sab ko nga di makabuot si Fayette sa schedule sa presidente. Nitando siya apan nipuno nga nagpaabot nang ilang sakyanan nako sa gawas sa restaurant.

* * *

Ang kapaspas sa among dagan paingon sa Hilton nakapakumbinser nako nga madayon ug masayo ang interview. Pag-abot namo sa lower ground floor, maoy pagkahuman og setup sa RTVM (Radio-TV Malacañang). Igo lang kong nakapahimutang sa lingkoranan, nisud dayon ang presidente uban ni Tourism Secretary Ace Durano ug ubang mga opisyal.

Paglamano namo nangayo siyag pasaylo sa pagkakanselar sa orihinal nga schedule ug gibasol ang iyang mga kawani sa pagtakda sa interview human sa mga tigom. Matud niya mas maayo nga ang interviews itakda sa di pang mga tigom nga way seguro kanus-a mahuman. Pagpanglingkod namo, diha pa kamatngon nga wa kong kaandam sa unang pangutana.

* * *

Ako lang gipahiyoman ang mga opisyal nga nagbanusbanos paghunghong nako nga di apikihong presidente. Apan ang ilang pahimatngon wa kinahanglana. Ang presidente hugtanong nagdumili pagtubag sa mga pangutana sa impeachment ug ubang kontrobersiya.

Kinsay sunod AFP chief? Ang scoop iyang gisaad ni Max Soliven. Mas detalyadong reaksiyon sa pagdakop sa mga sakop sa Magdalo? Sorry, mao nay iyang diskurso ugma sa Cotabato.

Way plano ang presidente pag-ulog-ulog nako, nga igo lang gisal-ot sa iyang pribadong kalingawan, og kasayuran nga makatay-og sa kalibotan. Ang pagkalimot nga di diay akoy nagkontrolar sa interview napugwat dihang gitapos ni sa RTVM human lang sa 16 minutos.

* * *

Email: [email protected]