EDITORYAL - Ang text hotline sa polis

Ang Cebu City Police Office aduna nay kaugalingong text hotline. Usa ka kaugmaran sa kapolisan nga gihangop ug nakapalipay sa daghang lumolupyo ning dakbayan.

Pinaagi sa mobile phone number 0921-4931616. Ang kuwartel sa kapolisan dinhi sa siyudad modawat og mga reklamo batok sa mga abusadong polis. Ug, of course, uban pang mga butang nga makatabang sa atong kapolisan.

Hinaut unta nga ang maong text hotline sa CCPO gamiton sa publiko kun duna silay reklamo batok sa abusadong mga polis o ubang mga butang nga makapalimpyo sa imahe sa atong kapolisan.

Hinaut sab unta nga dili kini yama-yamaan sa mga maldito ug kon dunay reklamo dili mag-ukon-ukon sa pagpaila sa ilang kaugalingon.

Anaa nay kahigayonan nga ang publiko makatabang sa pagpalimpiyo sa atong kapolisan tali sa mga naghugaw-hugaw sa pangalan niini. Mosakay og kalit MODUS Ni Uriel Vallecera

Mga suki, adunay mi-text kanako mahitungod sa modus operandi sa usa ka tawo nga sagad anha mag-operate sa may Colon, partikular na dapit sa may Colonnade. Sanglit tin-aw man nga pagkadetalye ang iyang text, nakahukom kong ipatik ang katibuk-an niini.

Ang text nagkanayon: "Sir, naa koy ihatag nga info nimo. Naa man goy polis diri dapit sa may Colonnade nga mosakay lang og kalit sa mga taxi nga mag-parking unya mangayo og tag P150.00 kada driver. Nawala na kana siyag taudtaod pero karon nibalik na sad. Kon makakita ra ba siya og mobile nga mag-siren kay motago dayon. Hadlokon niya ang driver kay magdala man sab og citation. Ang iyang attire uniform sa polis og kalo nga kinawboy (cowboy) nga naay magbitay sa may agtang. Naa diay manakop nga mosakay sa frontseat ug unya dad-on sa unahan ang taxi ug adto pangayoan? Unya pagkahuman mobalik na pod dapit sa may Colonnade kay mosakay na sab og laing taxi? Sakitan man god ko, Sir, kay driver man sab ang akong bana. Tingalig mabiktima unya siya nianang polisa. Gamay ra god ang ginansiya kada gabii." -- 0926-31751xx

Gituyo nako nga dili ibutyag ang kataposan duha ka digit sa cellphone number sa atong texter agig sanong sa iyang gihangyo. Nahadlok man god siya nga tingalig initan siya sa maong polis. Kay matud pa sa atong texter, naa pod siya kanunay dapit sa may Colonnade mao nga makaobserba gayod siya sa kalihokan sa maong polis nga "kilkilan".

Ang akong ikasulti niini mao nga himoan kinig pakisusi kon unsa gayod kini ka tinuod. Akong klarohon nga wala pa ko motuo niining maong taho pero mas maayo gayod nga masusi kini. Kinahanglan usab nga sutaon kon tinuod ba gayod nga polis kanang maong tawo. Basin nagpa-polis-polis lang kana kay motago man kaha kon may mobile nga mag-siren.

Panid-i ninyo kining tawhana nga anaa mag-operate sa Colon area partikular na sa may Colonnade. May nasimhot kong makapaduda base sa gitaho sa atong texter ug kini angay gayod nga tinuon.

* * *

(Sumbong ug reklamo? Text sa 0910-8105522)