Rape ug tigbakay

Kon tinuod man gani ang pasangil batok sa usa ka maestro sa University of Southern Philippines (Mabini campus) nga nanglugos kini og tinun-an niyang babaye, angay kini nga pahamtangan sa labing bangis nga silot.

Kamo diha, malooy kaha mo ni Gilbert Fuensalida Lumanog kon tinood man nga iyang giamong-amongan ang babayeng tinun-an? Ikaw Mr. Lumanog, kon ang imong anak ang buhatan sa ingon, mosugot ka kaha?

Sa ako nang giingon, kon toohan nimo ang pamahayag sa 16-anyos nga biktima, makapangagho ka uy. Kini si Lumanog, maestro ni sa Physical Education sa maong tunghaan.

Kaniadtong hapon sa Agosto 15, 2005 iyang gipatagsa-tagsa og pasulod sa iyang opisina ang mga tinun-an aron ipa-demonstrate kon unsaon paghimo ang cardio-pulmonary resuscitation ginamit ang tawo-tawo o rebolto.

Apan dihang ang gwapa nang dalagita ang misulod, gitrangkahan dayon niya ang pultahan og imbis ang tawo-tawo ang pahimoan og CPR, siya man ang nagpaka-biktima.

Ang CPR himoon kini "mouth to mouth." Sa ato pa mora'g mag-lips to lips. Ang gihilasan nga dalagita wala mopadapat sa iyang ngabil ngadto sa ba-ba sa maestro.

Giingnan kini nga siya na lang ang mo-perform ug ang dalagita maoy maghigda nga mora'g maoy dummy. Pastilan, giayo og romansa sa maestro ang dalagita.

Dili na lang nako idetalyi pag-ayo basta kay grabe g'yod. Maayo unta of malutsan dayon og warrant og arrest kining maong 23-anyos nga maestro aron mapriso.

Hala, kay gituyoan man nimo kining maong salawayong binuhatan Mr. Lumanog, nagpasabot nga gusto kang mopuyo sa BBRC isip ika 2,678 nga priso.

* * *

Kining text-text makadaut g'yod. Dalagita nalugos g'yod sa usa ka minyo nga lalaki kay mikompyansa pag-uban-uban sa maong tawo nga wala g'yod niya masinati.

Napasakaan na og kaso didto sa regional trial court ang giingong nanglugos nga si Hector Sencio, 27-anyos nga nagpaila nga usa ka Benjie Paciona ngadto sa iyang biktima.

Ang pangangkon ni Sencio nga manag-uyab sila ug ang dalagita dili lig-on nga depensa. Gitataw sa Supreme Court nga ang "sweetheart defense" dili garantiya nga makapaabswelto sa usa ka akusado.

Ngano man diay og uyab mahimo nang lugoson? Hala, Mr. Sencio pag-ila-ila mong daan og si Mr. Lumanog kay basin og mag-ipon mo'g selda.

Ang maayo nga butangan ninyo mao kadtong holding cell nga dunay lima ka priso nga nakuryentehan.

* * *

Kalma ra kaayo ang tinguha sa pagpalegalisar sa tigbakay diha sa kabarangayan ning dakbayan.

Tiaw mo, ang giuna mao nga ang gidaghanon sa legal nga mga buwangan dinhi sa dakbayan, dugangan og laing duha aron mahimo na nga unom.

Unya sa tumoy nga bahin niini, gibutang ang pulong nga "Other special cockfights during fiestas in the barangays."

Aw hinoon, maayo man nga ilegalisar ang tigbakay kay bisan og dili pa ilegalisar, dili man gihapon mahunong, apan kinahanglang atol ra g'yod sa mga fiesta ug sa mga adlaw nga dunay mahinungdanong okasyon.

Unsaon, nga ang mga tanod sa kabarangayan nga dili mauwaw mosul-ob og T-shirt nga dunay marka nga polis, dili man manakop.

Nagpatuga og pa-polis-polis nga dili diay gani makadakop ug makasumpo og mga illegal sa ilang barangay.