Terorismo sa Sugbo

Atol sa 'international conference on terrorism' nga gipahigayon sa isla sa Mactan niini lang bag-o, gikompirmar sa mga 'terrorism experts' nga nabutang sa dakong peligro ang Pilipinas. Ang kalugak sa 'backdoor' sa nasud maoy naka-ingon nga mas dali ang pagsulod sa mga dili dokumentadong langyaw sa Pilipinas. Adunay kapin sa siete mil ka mga isla ang nasud ug ang pipila lang ini ang adunay hugot nga siguridad. Gani may mga dapit nga usa lang ka tawo ang nakatutok sa pagsulod sa mga illegal alien. Kung magkalisud, pwede pang mahaylo og salapi.

Na-alarma ang Sugbo sa pagsulod sa kinse ka mga Indonesian Nationals nga dili mga dokumentado sa Brgy. Guadalupe, syudad sa Sugbo. Nabulgar ang pag-istar sa grupo dihang usa sa ilang kauban, namatay tungod sa sakit sa kasingkasing. Giingong Pilipino ang namatay ug hangtud karon wala pa gihapo'y nikuha sa patay'ng lawas. Nasikop sa mga otoridad ang duha sa kinse ka mga langyaw nga walay pasaporte. Giingong upat unta ka adlaw nga magpuyo ang grupo dinhi sa Sugbo, apan sa ikatulo ka adlaw, napugos sila sa paglayas tungod sa pagkamatay sa ilang kauban. Nagpabiling gawasnon ang dose pa ka mga sakop sa grupo.

Dili buot sa mga opisyal sa Police Regional Office nga mokompirmar nga terorista ang maong grupo. Gipadala na sa kapulisan ang 'fingerprints' sa duha ka mga nasikop lakip na ang namatay nilang kauban ngadto sa 'Automatic Fingerprint Identification System sa Camp Crame. Makig-alayon usab ang otoridad sa International Police ug sa kagamhanan sa Indonesia aron pagsuta sa tinuuray nga pagkatawo sa grupo.

Matud sa mga Indonesian nationals, ani-a sila sa Sugbo aron sa pagbakasyon. Apan daghang mga pangutana ang nagduwa karon sa huna-huna sa mga lokal nga opisyal, kapulisan ug bisan sa media. nganong wala man mokuha og pasaporte ug legal nga mga dokumento ang maong grupo aron limpyo silang makasulod sa nasud.

Wala kinahanglana ang 'visa' alang sa mga nasud nga sakop sa South East Asia kung diin ang Pilipinas ug Indonesia parehong kabahin sa maong lugar.

Una, nganong wala man gi-report sa grupo ngadto sa kapulisan ang namatay nilang kauban nga giilang si Francisco Vidal? Nagduda ang mga pulis nga Indonesian ug dili Pilipino si Vidal.

Ikaduha, unsa may gibuhat sa kinse ka mga lalaki sulod sa usa ka hotel su'd sa tulo ka adlaw? Nganong nagdumili man sila paghatag sa ilang personal nga detalye ngadto sa mga kawani sa hotel?

Ikatulo, nganong wala pamay nikuha sa patay'ng lawas sa namatay nilang ka-uban? Giingong taga Tagum, Davao del Norte ang namatay nga si Vidal. Unsa may iyang papel sa grupo?

Ika-upat ug labing importanteng pangutana, nganong wala man mokuha og pasaporte ug legal nga mga dokumento ang maong grupo aron limpyo silang makasulod sa nasud. Wala kinahanglana ang 'visa' alang sa mga nasud nga sakop sa South East Asia kung diin ang Pilipinas ug Indonesia parehong kabahin sa maong rehiyon.

Giisip nga labing dakong problema ang terorismo sa tibuok kalibutan. Ang nakapait kay sagad sa mga terorista, mga 'suicide bombers' kinsa nagtu-o nga usa ka sakripisyo ang pagpakamatay tungod ug alang sa ilang kawsa. Luyo sa paningkamot nga mapukan ang organisadong mga grupo sa mga terorista, usa lang klaro hangtud ning mga orasa, hulga ang terorismo sa bisan asang parte sa kalibutan. Ug ang pagpakabana ang gituhuang labing epektibong panagang.