EDITORYAL - Awhag sa konsehal gihangop

Atong gihangop kining balita diin giawhag ni Konsehal Arsenio Pacana ang Association of Barangay Councils ug Cebu City Anti-Indecency Board sa paghimog estriktong pagpatuman sa Anti-Noise Ordinance.

Ang maong ordinansa dugay nang napasar apan daw wala gayud kini mapatuman bisan pa sa kasaba nga kanunay masinati sa mga lumolupyo ning atong siyudad ilabi na sa mga takna sa kagabhion diin oras na sa tingpahuway.

Ang mga kasaba kasagaran mugna sa mga alingisig nga kahimanan sa musika nga gigamit sa mga diskoral atol sa kasaulogan sa mga sitio ug barangay fiesta. Mulongtad usahay ang maong kasaba sa mga takna sa kaadlawon.

Kini ug uban pang matang sa kasaba diin nakahatag og dakong purhesyo sa mga lumolupyo mahimong matapna pinaagi sa pag-implementar sa Anti-Noise Ordinance. Apan gipasagdan na lamang kini.

Hinaut unta nga ang awhag ni Konsehal Pacana paminawon ug hatagag aksyon sa mga buhatang hingtungdan.