Salamat kaayo Capt

Sigurado nga magkabulingit sa mga isyu ang among barangay Lorega-San Miguel tungod kay unsaon man, gipasagdan ra man sa among mga opisyal nga unta malikayan man ang maong mga kwestyonableng kalihukan.

Mangayo lang hinoon ko og pasaylo nga dili lang usa nako ibutyag ang maong mga isyu sa pagka karon. Law-ay kaayo nga himoon nako kini nga aktibo pa akong sakop sa Lupong Tagapamayapa sa barangay Lorega-San Miguel.

Pasiunhan nako pagpasalamat si Kapitan Fortunato Parawan ug ang mga konsehal sa among barangay nga gihatagan ko nila og higayon nga makaalagad sa barangay sa milabay nga katuigan.

Isip delicadeza, mora'g dili maayo nga magpadayon ko sa akong katungdanan sa barangay. Maayo unta og kini maoy sundon sa mga kauban nako nga kawani sa barangay nga nalambigit og kaso.

Ako gani nga walay nahimong kasaypanan, boluntaryo man nga mopahawa sa pwesto, kamo pa nga nakahimo og sayop? Kon moingon kamo nga wala pa kapamatud-i ang inyong kasaypanan, ingnon ko kamo nga huwata lang.

Human nako masayri ang ubang anomaliya sa among barangay gikan sa mga kawani nga mitug-an nako niini, nakapanglingo-lingo ko oy.

Nakaingon ko nga mao diay tingali nga mag-ukon-ukon ang among mga opisyal pagsuspenso sa barangay secretary kay nahadlok nga basin mobulgar kini sa maong mga isyu.

Usa ka kauban nako nga Lupon sa barangay miingon nga sigurado nga dunay mosaway sa akong gihimo nga pag-unay pagbulgar sa anomaliya sa among barangay.

Apan gitubag nako ang kauban kong Lupon pinaagi sa pag-ingon "Unsa man diay maayo, pasagdan lang nato nga magpadayon ang binuang?"

Ang akong baruganan mao nga kon magbinuang gani ang atong mga kawani sa barangay, dili nato sila angay'ng pasayloon lang kanunay.

* * *

Dunay polis nga maoy nagpasiugda og sugal diha sa usa ka barangay dinhi sa dakbayan. Kini maoy report nga miabot kanako gikan sa usa ka nagpakabana nga lumulopyo.

Awhagon nako ang maong polis nga mohunong na sa imong illegal nga kalihukan. Kon dili ka mohunong bay, sigurado nga pipila ka adlaw gikan karon madakpan ka og mag-atubang og kaso.

Bisan wala ko makaila nimo basi sa ngalan nga gihatag kanako, apan hatagan ko ikaw og higayon nga mag-usab. Kon magpadayon ka gani sa imong binuang, aw ikaw lang.

Akong klarohon, tigbakay ang illegal nga sugal nga gipasiugdahan niining maong polis. Nahibulong ko, kay ang kapitan aning maong barangay nagpasiatab man nga aktibo siya sa illegal nga sugal, wala man lagi ka makalihok Capt?

Nahadlok ka sa polis? Gituyo nako nga dili hinganlan ang barangay kay aron dili kaayo bulgar. Kon magpadayon ka gani Mr. Policeman, walay problema.

Ang sagad tigbakay nga gipasiugdahan niining maong polis sagad himuon sa Sabado, Domingo ug mga fiesta opisyal.

* * *

Maayo tingali nga pangilisan o kaha panangtangon sa mayor ang mga sakop sa City Hall demolition team. Wala sila'y nahimo sa paglimpyo sa atong mga aseras gikan sa mga illegal vendors.

Mga illegal structures nga gitukod diha sa aseras wala nila mapugngi. Unsa man, wala mo'y monitoring sa lainlaing dapit sa dakbayan?

Kon moingon kamo nga "busy" kaayo kamo sa mga gimbuhaton, ipalihug kuno ko og lista sa inyong mga gitrabaho kay timbang-timbangon nato og sayop ba ko sa pag-ingon nga nagligoy na mo.