Buhat sa kaluoy

Adunay usa ka lungsod kang kansang agianan maagian lamang hagip-ot kaayo. Tungod niini, daghan kaayong mga aksidente nga mahitabo. Sa maong mga panghitabo ang kura paroko sa maong dapit, nagwali gayud nga kinahanglang ang mga parokyano niya mahisama gayud unta sa usa ka maayo ug matinabangon nga mga Samaritano. Tuod man, ang mga parokyano tugob sa dakong kamasinugtanon, motuman gayud agig sanong sa pagmaymay sa ilang padre kura sanglit usa man kini ka maayong buhat.

Nagkadaiya ang mga sugyot agig tubag sa dakong panginahanglan kon ugaling adunay mga aksidente nga mahitabo. Ang usa misugyot nga mas labing maayo nga dunay ambulansiya nga paliton. Ang pari mibatbat niini sa iyang wali og tuod man ang mga tawo nanghatag ug usa ka ambulansiya ang napalit. Sa paglabay sa pipila ka mga adlaw, usa ka konsehal ang misugyot nga aprobahan ang proyekto sa pagpalapad sa hagip-ot nga dalan nga maoy hinungdan kon nganong adunay mga aksidente nga nahitabo. Apan ang mayor sa maong dapit adunay merkado daplin sa dalan ug ang paghimo sa ingon maoy hinungdan nga mawala og apil ang iyang namontar nga pamatigayon. Adunay pipila nga mihangyo sa pari nga mohangyo sa mayor sa panghinaut nga mapalapdan ang maong dalan. Wala manumbaling ang pari sanglit dili siya buot nga manghilabot sa mga butang nga dunay kalambigitan sa pamolitika. Tuod man sa sunod Domingo ang pari, nagdasig sa mga katawhan nga mamahimong mga maayong mga samaritano pinaagi sa pagpunit ug pagtabang ni bisan kinsa nga maaksidente sa maong hagip-ot nga dalan. Ug silang tanan, nituman sanglit ang maong buhat usa man ka maayong buhat.

Pamalandong

Maayo ang motabang agig pagsanong sa mga problema. Apan mas labing maayo kon mohimo og mga lakang sa pagpugong sa usa ka kadaut.