Padayon, mga environmentalista

Dili angayang himuong basehan nga mo-atras na sa kampanya ang mga environmentalista ang nahitabo ni Elpidio dela Victoria Jr. nga gipusil-patay sa iyang panimalay.

Gawas kang dela Victoria, aduna pa kitay daghang mga sama kaniya nga mahigugmaon sa kalikupan ug mi-uban sa krusada pagpanalipod batok sa pagpangabuso sa kadagatan.

Hinaut, ang nahitabo kang dela Victoria maoy makapa-init sa gana sa mga sama kaniya nga mopadayon sa kawsa ug maoy makapabukas sa tabil aron mahibaw-an ang mga nagpahipi nga sindikato nga maoy naligsan ug natumban sa kampanya ug krusada sa program director sa Bantay Dagat.

Si Atty. Antonio Opposa, ang nailang abogado nga environmentalista nga usa ka Sugboanon apan atua magbase sa kauluhan, misaad nga magpabilin ang ilang kaisog gamit ang nagpabiling espiritu sa krusada nga gibilin ni dela Victoria dinha kanila.

Kanatong mga yanong mga magbabasa, mahimo ang parte pinaagi sa pag-ila unsay atong mabuhat alang sa pagprotehir sa kalikupan aron, sama ni dela Victoria, mahimo kitang tiunay nga protektor sa kalikupan.