Ilisan og lain

Karong panahona usa sa sagad nga mahunahunaan natong paagi kon makabsan og kuwarta mao ang pagprenda sa atong mga alahas, cellphone ug ubang mga kabtangan. Mao man gani kini ang hinungdan nga kusog kaayo ang negosyo nga pawnshop karon.

Pero angay kitang magbantay kon kita magprenda og butang kay adunay mga prendahanan nga mopahimulos pod sa higayon. Usa ka magbabasa niining lindog nga nagpaila nga usa ka sundalo mi-text kanako aron pagsumbong sa iyang kasinatian kalabot niining maong estilo sa modus operandi.

Matud pa sa iyang text kanako, nagprenda siyag cellphone sa usa ka prendahanan diha sa Colon. Iya ganing gihinganlan ang maong prendahanan sa iyang text apan ato lang unang gipugngan. Pero sa akong pagsabot sa iyang text, naglagot gayod siya sa maong prendahanan nga naghimog binuang ngadto kaniya.

Niadtong Marso 11 iya nang gilukat ang naprenda niyang cellphone. Sa iyang tan-aw, mao gayod kini ang iyang cellphone. Apan sa paghiabot na niya sa balay iyang nadiskubrehan nga lain na ang battery ug charger niini. Giilisan og lain!

Ang battery ug charger nga giilis dili original. Giilisan ang iyahang charger ug battery sanglit original pa man kadto, dali rang mo-charge ug dugay mo-lowbat. Ang giilis nga battery ug charger kaniya bati kaayo. Pastilan!

Pagbantay kamo niining maong modus operandi. Kon dili man kalikayan nga magprenda kamo sa inyong cellphone, seguroa nga iniglukat ninyo niini, wala kiniy kulang. Inspeksiyona kon wala ba ilisi og lain ang battery ug charger niini. Sa dili ka pa mobiya sa prendahanan. Wayis ra ba usab kini sila. Dili na modawat og reklamo kon imo pang paugmaan o baka ha kon nakabiya ka na sa maong prendahanan ayha pa nimo madiskubrehi ang depekto. Mao nga pagbantay gayod kamo.

"Basin daghan pa ang mabiktima nila," nagkanayon ang atong texter nga usa ka sundalo nga tag-iya sa cellphone number 0918-3661971

* * *

(Sumbong ug reklamo? Text sa 0910-8105522)