Electronic raffle kuno

Hangtod karon nagpadayon pa gihapon sa pagdagsang ang text scam. Tungod niini, nahukman niining ubos ninyong maglilindog nga ipadayon pa gayod ang pagpahimangno sa katawhan batok niining maong matang sa tinonto. Nagtuo ko nga daghan pa gayod ang wala masayod niining maong paagi sa pangilad. Basin pa diay nga kadtong wala pa makabasa sa nahauna natong mga pahimangno masayod na niining higayona sa atong pagsubli.

Usa sa labing bantayanan karong panahona mao kining modus nga maoy gamiton nga pasangil ang electronic raffle. Daghan na ang nabiktima niini. Daghan na usab ang buot biktimahon sa mga badlongon sa katilingban pinaagi niini mao nga kinahanglan gayod nga magmabinantayon ang tanan. Kining maong paagi sa pangilad ipaagi gihapon sa text. Ang estilo sa maong modus operandi magpadala gihapon og congratulatory message ngadto sa prospect.

Usa ka magbabasa niining lindog mi-text kanako nga nagkanayon: "Good day, Sir. I want to inform you that a certain EC (initial) send me a message saying that I won 3rd prize thru electronic raffle draw. His number is 0915-7624615. Mao kini iyang message: 'Good day. We inform you that your cellphone number had won 3rd Prize, P920,000 in your Mongol Pencil 90th Anniversary Electronic Raffle Draw last November 11, 2005. I'm EC. Call me up for more details.' Mao kini ang iyang text." -- 0927-9965167 (Jan. 11, 2006--10:13:30)

Una sa tanan, wala ako makabalita kon aduna bay promo nga gipasiugdahan ang Mongol Pencil nga ingon niini. Kon aduna man, atong kompirmahon kon konektado ba kanila kini si EC nga nanag-iya sa cellphone number 0915-7624615. Sutaon usab nato kon ipaagi ba lang gayod sa text ang pag-inform sa mga mananaog sa promo. Nagtuo man god ako nga wala gayoy kalambigitan ug kasayoran ang Mongol niining maong tinonto. Binuhatan ra kini sa mga badlongon sa katilingban.

Sa akong pag-analisar, mas duol sa tinuod nga usa kini ka pangilad kay sa tinuod. Electronic raffle kuno, ha? Unsaon god intawon pagdaog sa usa ka tawo nga wala moapil o mosalmot og promo? Mokalit lang diay og kadaog? Ingon na ba gayod diay niana kasayon ipanghatag ang kuwarta karon? Imposible! Mao nga mas katuohan nga usa kini ka matang sa text scam.

Aron seguradong dili mabiktima, mas maayo nga dili gayod motubag sa bisan unsang congratulatory message nga madawat. Kini ang labing epektibong paagi aron makalikay sa mga mangingilad. Bantayi sab ninyo ang numero ni EC aron dili kamo mailad sa higayon nga magpadala siyag text scam nganha kaninyo.

Sumbong ug reklamo? Text sa 0910-8105522