Awit sa bata

Ang kantang "Tatay, Pauli Na", nga maoy kampeyon sa 26th Cebu Popular Music Festival karong tuiga, gitambayayongan paghimo sa duha ka magtutudlo: Ang kompositor nga, bisan lawom ug abunda ang pormal nga edukasyon ug pagbansaybansay sa musika, wa makasuway pagsuwat sa iyang kaugalingong huni,; ug ang lyricist nga, samtang tinuoray'ng nahigugma ug nagpakabana sa pagpalambo sa iyang kaugalingong dila, wa sukad masukad mosuway pagsumitir sa iyang mga sinuwat para sa publikasyon.

Hangtod nga nagkatakdo ang kalit lang nga pag-ukyab sa ilang masigka higanteng awhag ug panginahanglan pagpadayag sa ilang kaugalingon. Si Dennis Gregory Sugarol, ang kompositor, human nakabati sa emosyonal nga kanta sa anak ni Gwendolyn Suico-Crescencio, ang lyricist, kusganong niawhag sa nauwahi sa pagsuwat og balak nga iyang kapahaoman og huni.

* * *

Si Dennis nakumbinser nga dunay mas gamhanang puwersa nga nag-abot nilang Gwendolyn, nitakdo sa managsama nilang mensahe, pinasikad sa managsama nilang kahimtang ug pagsangyaw sa sipa ug gamhanang tuaw para sa hut-ong sa katilingban nga giulog-ulogan sa ilang dakong tampo sa nasudnong ekonomiya pero gipasagdan sa dakong kadaot nga nahiagoman sa mga pamilyang pugos nilang gitalikdan sa ilang pagpanarbaho sa langyaw'ng kabaybayonan.

Ang bana ni Gwen dugay nang nanarbaho sa Taiwan ug karong bag-o tua na sa Dubai, mauli kausa ra sa usa ka tuig. Ang ulohan sa iyang gilalik nga mga titik, "Tatay, Pauli Na", morang gilangkat sa kasingkasing ni Gwen kay maoy kanunayng malitok sa iyang duha ka gagmay'ng anak samtang mamintana nga puno sa pangindahay nga ang gikamingawang amahan magpakita na unta. Si Dennis otro sang OFW. Bisan batan-on pa, daghan nang kanasuran ang iyang naadtoan kuyog sa ubang mga mag-aawit.

* * *

Ang laing inspirasyon ni Dennis maoy nakahingpit sa talagsaong kumbinasyon. Gihimoan niyag huni ang sinuwat ni Gwen human nakahukom nga ipakanta ni sa bata nga wa pa niya igkita: Si Grant Dosdos igo lang niyang nabati sa recording ni Elvis Somosot, usa sa labing bantogang haligi sa padayong pagpalambo sa Sugbuanong mga awit. Ang iyang pagkabihag sa tingog ni Grant wa kaandam ni Dennis sa laing makapakugang nga kasayuran: Ang amahan ni Grant, sama nilang Gwen, usa sab ka OFW.

Ambot tungod ba lang sa kadaghan na sa OFWs maong sayon rang nag-abot ang mga dan nilang Dennis, Gwen ug Grant. O tinuod bang ilang pagtoo nga ang Balaanong Bata maoy nagpaila nila sa usag-usa aron pagtuman sa kutas nga tahas: Ang pagpukaw sa usa ka gobyerno ug sa usa ka katawhan nga kutob ra sa pag-ihap sa dolyar pero di andam nga moatubang ni motuki sa pait nga sangpotanan sa bangis nga paglinay-anay sa mga anak ug mga ginikanan.

* * *

Email:[email protected]