Husto si Gen. Yap

Diha sa Ibo, Lapu-Lapu City, duol sa baybayon, gawas sa koral sa approach sa runway sa Mactan airport, alegre kaayo matag gabii tungod sa mga barbecue-hanan nga nakadanig daghang tawo, lakip na gani gikan dinhi sa mainland.

Waa gyud hinoon ko kasuway diha, apan, dihay pipila ka higayon nga nakalabay mi, ug among nakita ang kadaghan sa tawo.

Apan bag-ohay pa lang, gipahunong ni Gen. Yap, isip general manager sa MCIAA, ang pagpanindag pagkaon sa maong dapit. Ug natural, nakalitan ang mga hingtungdan nanindag barbecue, lakip na ang regular nga mga customer niini.

Waa man ko kasubay ning maong kaugmaran, apan, lagmit, ang hinungdan sa pagdili na sa pagpaninda ning maong dapit, for reason of safety.

Alang nako, iksakto si Gen. Yap. Ang nakadaut god natong mga Pinoy nga mao pay atong ipanguros tapus sa usa ka sipa' kaayo nga dugdog ug kilat. Mao pay atong ikahunahunag inspection sa mga building tapus sa dakung sunog, mao pay atong i-check sa kaseguroan sa mga sakyanan tapus sa usa ka aksidente sa dalan, mao pay atong itrabaho sa drainage tapus sa dakung lunop, mao pay atong ikahunahuna pagpagamit og armas sa mga judges o sa mga journalists, tapus sa pagpusil kanila.

Wala kanatong mga Pinoy ang pagpanagana ug pagpangandam. Maoy hinungdan nga alang kanato, OK lang nga gihimong kan-anan ug tapukanan sa daghang tawo, ang duol sa runway sa Ibo side sa airport.

Alang nato, unya na ta mamahawa diha tapus sa disgrasya, simbako. Apan si Gen. Yap, di gustong manimbako, di gustong maghuwat og disgrasya. Ang iya, panagana, manguros siyang daan sa waa pay dugdog ug kilat. Busa, alang nako, husto si Gen. Yap. In the first place, ngano man nga mitugot man tuod ang Lapu-Lapu city hall ini no?