EDITORYAL – Vigilantes na pud

Misiaw og balik ang vigilante killing sa dakbayan sa Sugbo. Tulo gyud ka mga giingong "badlungon" sa katilingban ang dili makasaulog sa ilang Bag-ong Tuig tungod kay gidungan og tumba sa managlahing dapit.

Samtang ikalipay sa kinabag-an ang pagkahilis sa gidaghanon sa mga kriminal ug mga badlungon sa katilingban pinaagi sa tabang sa mga vigilantes, apan padayon gihapong ikondenar ang klase sa pagkutlo sa ilang kinabuhi.

Ang pagbutang sa balaod diha sa mga kamot sa pipila dili madawat sa balaod sa Diyos ug sa tawo.

Sa balaod, kinahanglang taralon una sa hukmanan ang tawo una pahamtangan og silot.

Badlungon man sila, apan tawo lamang nga, sama nato, adunay tawhanong katungod nga gipanalipdan sa balaod.