Modus sa airport

Una sa tanan, akong ipasabot nako nga kining maong modus operandi wala mahitabo dinhi sa airport sa Sugbo (Mactan Cebu International Airport) kondili sa tugpahanan didto sa kaulohan. Niadto pang 2003 gibutyag kining maong binuang. Ang nagbutyag niini mao ang kolumnista sa usa ka national daily tabloid nga si Jun Guillermo.

Ikaduha nakong ipasabot mao nga wala ako mangandoy nga mahitabo usab dinhi sa Sugbo kining maong estilo sa modus. Pero labing maayo gyod nga dili kita mokompiyansa. Kinahanglang makabantay kita sa lainlaing diskarte sa binuang sa mga badlongon sa katilingban maong gisulat ko kini. Namasin ko nga pinaagi niining kolum, makabantay kamo niining matang sa tinonto sa airport kon ugaling may nakasuon na niini nga mga badlongon diha sa atong tugpahanan o ba kaha kon kita mahitaak sa tugpahanan didto sa kaulohan.

Ang estilo mao nga kon ikaw anaa na sa airport ug mamatikdan nga padulong kang mosakay sa ayroplano, may tawo nga moduol kanimo ug mopugos pagdala sa imong bagahe. Dili ka gyod niya lung-an kon dili ka mohatag og tip. Mas paborito nilang ig-on ning maong tinonto ang mga langyaw. Mosugat sila ug (morag mga opisyal) moinspeksiyon sa mga papeles sa langyaw. Unya moingon dayon nga may depekto ang iyang tiket.

Depekto? Unsang klaseha sa depekto? Kon tinuod pang adunay depekto, nakita unta kini sa pag-agi sa maong tiket sa electronic gadget. Ug kay nakalusot man kini, nagpasabot nga kompleto na sa datos. Apan mopatuo gayod ang mga suspek nga may depekto lagi gayod ang tiket. Tungod niini, posibleng mahitabo ang daklit nga panaglalis.

Dinhi na mosulod sa esena ang usa ka tawo nga magpatuong polis. Moingon kini nga valid ang tiket sa foreigner ug siya na lang kuno ang mo-assist aron makasulod ang langyaw ngadto sa departure area. Unya dad-on niya ang langyaw ngadto sa CR kay may sekreto kuno silang panagsultihan. Didto hilngon sa polis ang tiket sa langyaw. Unya moingon kini nga tinuod gyod diay nga may depekto ang tiket.

Dayon hulgaon sa suspek ang langyaw nga puyde siyang pasakaan og kaso tungod kay palsipikado ang iyang tiket. Natural, mahadlok ang langyaw. Busa iya na lang dawaton ang gitanyag nga areglo sa suspek. Maong makahatag gayod siyag dakong kantidad. Wala siyay kasayoran nga kadtong tawo nga unang miduol kaniya ug ang ikaduha nga nagpatuong polis kakunsabo ra.

* * *

Sumbong ug reklamo? Text sa 0910-8105522)