EDITORYAL - Pahalipay ngadto ni Dr. Stephen S. Gaisano

Ang University of San Carlos mipasidungog kagahapon sa usa ka Sugbuanon kinsa nakatampo og daku sa kauswagan ug kalambuan sa Sugbo pinaagi sa tinarong nga negosyo ug pilantropiya.

Si Don Stephen Sy Gaisano, Sr. gikonpermahan sa gihisgutang unibersidad og Doctor of Humanities, honoris causa, diin mitambong ang kadagkuan sa eskuwelahan pinangulohan ni Fr. Roderick C. Salazar, Jr., SVD.

Ang pagpasidungog kang Mr. Gaisano gibase sa mga kaayuhan nga iyang nahimo sa natad sa negosyo nga nakatabang og dako sa kalambuan sa Sugbo ug sa natad sa edukasyon diin ang mga anak sa mga banay'ng kabus nahatagan og kahigayunan sa pagpadayon sa ilang pagtungha.

Si Mr. Gaisano maoy nagpasiugda sa scholarship program ubos sa Doña Modesta Singson Gaisano Foundation diin si Stephen mao say nagtukod.

Gatusan ka mga batan-ong Sugbuanon ang nakapahimulos sa maong scholarship program diin matag usa nakadawat og scholarship grant nga P25,000 sa sinugdanan ug P100,000 na karon.

Daghang Gaisano scholars ang anaa na karon sa maayong pagkabutang sa pamatigayon, sa gobiyerno, ug sa uban pang panginabuhian nga ilang napili.

Si Stephen maoy labing una nga nigamit sa ngalan Gaisano sa negosyo. Ang unang Gaisano superstore mao kadtong gitukod niini diha sa dan Colon diin nailhan karon nga Gaisano Main.

Sukad sa pagtukod ni Stephen sa iyang Gaisano superstore ug tungod kay dali nga gipatronisar kini sa katawhan ang iyang mga igsuon nagtukod usab sa ilang Gaisano store ug kini anaa na sa Luzon, Visayas ug Mindanao.

Angay gyud tuod nga pasidunggan si Stephen kinsa nailhan na karon nga Dr. Stephen S. Gaisano, Sr.

Among pahalipay niining amahan sa tanang Gaisano superstore ug mga mall tibuok nasud.