EDITORYAL – Prayer rally nga way prayer

Naandan na sa mga militanteng sakop sa political opposition ang paghingan sa ilang anti-Arroyo demonstration nga usa ka prayer rally kun prayer march. OK ra kini kun aduna ba gyud tinuod nga "prayer" kun pag-ampo o pagpangadye o pagpangaliya atol sa maong mga prayer rally.

Pero sa atong nasaksihan sa linawas nga panghitabo ug sa telebisyon, ang mga raliyista wala gayud mangadye. Nagpunay lag singgit og mga slogan batok sa kagamhanan ug batok sa Presidente.

Ato sang nakita nga ang maong mga kunohay prayer rally inapilan usab sa mga konpirmadong walhon (leftist) ug komunistang personalidad.

Ang mga tigpahigayon niining maong prayer rally o prayer march, aron kahatagan og bulok relihiyoso ang ilang gitawag nga prayer rally, mo-imbitar og mga aktibistang pari ug madre sa pagsalmot sa ilang kalihukan.

OK kaayo ang prayer rally pero kinahanglan duna gyuy prayer di lang rally nga pulos pangatake sa kagamhanan.

Di ba maayong dili lang nato gamiton ang ngan sa Ginoo sa mga kalihukan nga dunay kasuko ug kainit sa ulo?

- Tampo ni Dr. Luvismindo Gallardo ug giadoptar isip guest editorial sa Banat News.