Patay nga parokya

Usa ka batan-ong pari ang nadestino isip kura paroko sa usa ka gamay'ng lungsod sa Oklahoma. Ang kadasig sa maong pari gisugat og makaluyang pamahayag nga iya lang kunong giusikan ang iyang panahon sanglit ang maong parokya, patay man. Dala sa tumang kasubo, gipabandilyo sa maong kura nga himuon sunod Domingo ang usa ka Misa Requiem pahinungod sa namatay nga parokya.

Tuod man, napuno ang simbahan sa mga parokyano. Nisugat sa ilang panan-aw ang usa ka dakong lungon nga giadornohan og daghan kaayong mga buwak. Pagkahuman og basa sa obitwaryo, gidapit sa kura ang mga tawo nga mohimo sa ilang katapusang panamilit pinaagi sa pagsud-ong sa dagway sa maong minatay.

Matag usa nibati og tumang kaguol kay sa matag higayon nga sila mosud-ong sa maong lungon, ilang nakita ang ilang kaugalingong dagway sa salamin nga gipatapot niini.

Pamalandong

Ang mga parokyano mao ang kinabuhi og dugo sa parokya. Dili sukaranan ang mahabog og maanindot nga mga inprastraktura sa usa ka buhi, og malamboon nga parokya. Kay usahay, kining mga butanga, makalimbong sa atong panlantaw.