Passcor ra ba gyud?

Wala na lang ba gyuy laing security agency nga mapunit kining Mactan Cebu International Airport, gawas nianang Philippine Aviation and Security Services Corp. (Passcor)?

Anomaloso kaayo ang pagdaug nianang Passcor sa subasta alang sa P12-milyones nga kontrata tali sa MCIA ug sa maong security agency. Busa maayong pugngan sa bids and awards committee ang pag-award sa maong kontrata ngadto sa Passcor kay kuyaw kining madeklarar nga nulo tungod sa ka-anomaloso.

Una, si MCIA general manager Adelberto Yap mao diay board chairman sa Passcor.

Bisan unsaon og pangulipas ni Yap, bisan ang bata makatuo gyud nga iyang giimpluwensiyahan ang bids and awards committee (BAC) sa MCIA nga gipangulohan ni Veronica Ordoñez aron mapunta ngadto sa Passcor ang security contract.

Kun ipamugos sa MCIA, pinaagi ni Yap, ang pag-award sa kontrata ngadto sa Passcor, molutaw gyud ang "conflict of interest" tungod kay siyay general manager sa MCIA ug siyay board chairman sa Passcor.

Ang Passcor nga mi-bid og P12 milyones maoy gipadaog sa subasta, bisan ang kaatbang niining agency nga mao ang BA Investigation and Security Agency Inc. (Baisa) mi-bid og mas kubos og P399,977.31.

Gitiklo lang ang Baisa sa bidding tungod sa rason nga walay aviation security training, kulang sa mga ekipos, ug mga tigulang ang mga guwardiya.

Pero, ang presidente sa Baisa nga si Lester Mendoza miingon kay giisyuhan ang Baisa og endorsement to pre-qualify nga nagpasabot nga kuwalipikado silang moapil sa subasta.

Ang pagtug-an ni Yap sa tinuod nga ang Philippine Airlines ug ang MCIAA mismo nanag-iya og share sa Passcor nakapasamot sa pagtuong "lutong macao" ang bidding nga mipadaog sa Passcor.

Kun akoy Mendoza ikiha nako sa Ombudsman si Yap ug si Ordoñez ug papugngan nako sa korte ang pag-award sa kontrata ngadto sa Passcor pinaagi sa injuction tungod sa tataw nga conflict of interest ni Yap.

* * *

BROKER. Mahibulong gyud ko diha sa Bureau of Customs. Midagsa ang mga maanyag ug mga dalaga nga mga "bata-bata" sa mga customs brokers.

Kini sila maoy magbahasbahas diha sa adwana pagpapirma sa mga import entries ug uban pang mga dokumento nga gikinahanglan nilang personalon sa pagproseso diha sa BOC-Cebu.

Bisan naghuot na ang mga tawo sulod sa edipisyong giabangan sa BOC-Cebu, mag-antus intawon kining mga babayeng tig-follow up sa mga papeles sa pagbahasbahas.

Mao diay! Dihay broker nga akong na-estorya. Mingon siya nga gituyo nilang mga "guwapa" ang tigpapirma aron ang signatories sa mga papeles ma-engganyo sa nagdala sa dokumento aron makapirma nga wala kusmod.

Kasagaran ra ba sa mga customs examiners ug appraisers mga lalaki. Siyempre, kay chicks lagi ang nagdala sa dokumento, dali ra gyud kaayo ang pagpapirma.

Gidungog ra ba nga ilisan na usab ang hepe sa Assessment Division sa BOC-Cebu nga si Emmanuel Laudit.

Balita nako nanghilabot si Secretary Ermita sa Malacañang aron hulipan si Laudit.

Ang rason nganong ilisan si Laudit mao ang pagkubos sa koleksiyon. Tayming pud nga mikubos ang volume sa entry.

Hinuon, hagit ni Tony Aseniero ang pagpadako pa gyud sa koleksiyon sa higayon nga mapirmahan na ang customs personnel order pagtudlo niyang hulip kang Laudit isip hepe sa Assessment Division sa BOC-Cebu.