EDITORYAL - Bahad nga nagpabiling bahad

Matag human sa pipila ka mga transport strike nga nahitabo dinhi sa siyudad sa Sugbo, si Mayor Tomas Osmeña masuk-anon nga mibahad nga tangtangan og prangkisa kadtong mga PUJ operator nga nangapil sa welga.

Apan ang maong mga bahad nagpabilin nga mga bahad lang. Hangtud karon diin lain na sang welga sa mga sakyanan ang gipahigayon sa mga operator ug drayber.

Naay mga drayber mismo nga nagkanayon nga tungod kay wala man tumana sa mayor ang iyang "saad" nga patangtangan niyag prangkisa ang mga operator nga nangapil sa mga welga nawad-an nag kahadlok kining maong mga operator sa pag subli-subli sa ilang strike.

Mao usab kini ang hunahuna sa usa ka opisyal sa Land Trasportation Franchising Regulatory Board (LTFRB) dihang gi-interview kini sa usa ka estasyon sa radyo.

Suma pa niining maong LTFRB opisyal sukad sa unang gibuhian bahad sa mayor wala pay bisan usa ka operator ang nabawian sa ilang prangkisa.

"Mas maayo pa'g dili nalang magbahad-bahad ang mayor nga manangtang siyag prangkisa kun dili man lang kini matuman," matud pa sa usa ka dakong negosyante. "Mahimo ra siya nga kataw-anan atubangan sa mga welgista...Ug madaut ang iyang kredibilidad."

Dili masayon, sa tinuod lang, ang pagtangtang sa prangkisa sa usa ka PUJ operator. Moagi kini sa daghang proseso-- kun sa linguwahe pa sa kadalanan, kuskos-balongos -- diin mahanaw ra sad ang maong tinguha kun walay political will ang mihimo sa bahad.