Sayo nga pagpanaw

Usa ka dakong kawad-on sa natad sa politika sa nasud ang pagpanaw ni kanhi Senador Raul Roco sa nakalabay'ng semana tungod sa prostate cancer. Daghan ang gianugonan sa iyang sayong kamatayon gumikan sa iyang maayong pagpanerbisyo sa katawhan.

Usa na siguro si Roco sa labing ligdong nga politiko ning atong panahon. Sa iyang pagka-senador ug pagka-sekretaryo sa Departamento sa Edukasyon, daghan ang mibilib kaniya.

Limpiyo usab ang iyang pagkatawo. Wala ko makadungog og mga anomaliya nga iyang gikalambigitan sa nagserbisyo pa siya sa nasud. Mao nga ako nagtuo nga usa ka maayong presidente ang kanhi senador kon ato unta siyang gihatagan og higayon.

Apan subong palandungon ang iyang sayo nga pagpanaw. Kini tungod kay wala pa matuman ang iyang politikanhon misyon. Ug ang maong misyon mao ang pagtuman sa iyang mga saad alang sa usa ka bag-ong Pilipinas.

Hapit gayud mahimong presidente sa nasud si Roco. Sa wala pa ang piniliay sa niaging tuig, humot kaayo ang kanhi sekretaryo sa nagkalainlaing sektor, ilabina ngadto sa kababayen-an ug kabataan.

Apan ang iyang kakulang sa pinansiyal nga makinarya ug ang dako nga balita sa iyang kanser sa prostate maoy nakapayabo sa iyang kandidatora. Daghan ang nagtuo nga kon ang business sector mipaluyo pa kang Roco sa niaging eleksiyon, dako ang iyang tsansa nga modaug bisan pa sa kagamay sa iyang partido, ang Aksiyon Demokratiko.

Siguro dili gayud alang kang Roco ang labing taas nga posisyon sa nasud. Sayo siyang mipanaw nga wala matuman ang iyang pangandoy paglingkod sa Malacañang, ug kana nga frustration maoy labing dakong lama sa iyang politikanhong career.

Usa ako sa dunay dakong pagtuo ni Roco. Akong nakita kaniya ang grabe nga dedikasyon sa serbisyo publiko nga daghan sa atong lideres ang nagkulang bisan pa man sa ilang hataas nga panahon sa panerbisyo.

Gani, ako nagtuo nga siya ang labing hait nga tunok sa agianan ngadto sa ikaduhang termino ni Presidente Gloria Macapagal-Arroyo. Apan sama sa sakyanan nga nabuthan og upat ka ligid ang iyang kampanya sa niaging eleksiyon gumikan sa iyang sakit ug kawad-on sa suportang pinansiyal.

Wala koy nakita ni usa sa kasamtangang hut-ong sa atong mga lider nga susama kaligdong sa pagkatawo sa kanhi senador. Kini tungod kay puro lamang alang sa ilang politikanhong interest ang nagpasulabi niining anaa sa kagamhanan karon ug nawala na ang ilang dedikasyon ngadto sa katawhan.

Ang kamatayon ni Roco nagpahinumdum kanato nga kon naghandum kita og tinud-anay'ng kalamboan, dili nato ihikaw ngadto sa maayong mga indibidwal ang panahon pagdumala sa atong nasud.