Hold-aper sa compartment

Kining maong estilo sa modus operandi talagsaon kaayo. Nagtuo hinuon ko nga wala pay nahitabo nga ingon niini dinhi sa Sugbo. Apan may nahitabo na nga ingon niini didto sa kaulohan mao nga ako kining gikolum karon sa tinguha nga makabantay usab kamo ug dili mabiktima sa mga badlongon sa katilingban.

Adunay mga hold-aper karon nga maoy paboritong biktimahon ang pasahero sa mga taxi. Kasagaran, kakunsabo nila ang taxi driver. Kay kon dili pa, dili gayod matigayon ang ilang tuyo ngadto sa pasahero. Hinaot unta nga wala pay misuon niining maong tinonto dinhi sa Sugbo.

Ang estilo mao nga ang hold-aper magtago nang daan sa sulod sa compartment sa taxi. Busa dayag kaayo nga may kalabotan ang driver sa iyang modus. Ang compartment nga atong gipasabot dinhi mao ang luyong bahin sa sakyanan diin adto ibutang ang bagahe sa pasahero.

Pananglit matiyempohan nimo pagpara ang taxi nga may kargang hold-aper, wala ikaw ing kasayoran nga may tawong daotan diay nga karga niini. Ang driver mismo sa taxi nga kakunsabo sa hold-aper maoy mangitag paagi nga makagawas ang maong suspek gikan sa compartment.

Kon mohunong na ang taxi, moluwan dayon ang pasahero. Niining higayona, mokalit paggawas ang hold-aper gikan sa compartment ug molingkod dayon tupad sa prospective victim. Natural nga makugang ang biktimahonon sa kalit nga pagtungha sa suspek sa sulod sa taxi.

Dili na makalihok ang biktima sa sulod sa taxi tungod kay tionan man dayon siya sa suspek sa dala niining armas. Dihadiha kuhaon niini ang tanang valuables ug kuwarta sa biktima. Ang biktima dili makahimo pagtutol tungod kay armado man lagi ang suspek. Ang driver sa taxi dili lang usab magtingog.

Sumala sa atong tinubdan, maoy paboritong biktimahon niining maong matang sa hold-aper ang mga ka babaye. Ang sagad nilang biktimahon mao ang babaye nga mag-inusara lang sa pagsakay sa taxi. . Daghan na ang nabiktima niini didto sa Metro Manila, sumala sa kasaligan kong tinubdan nga si Jun Guillermo, kinsa usa usab ka aktibong sakop sa prensa sa kaulohan.

Tungod niini, nanawagan kining maong kolum nga kon kamo mosakay og taxi, isulat o ilista una sa papel ang tanang impormasyon sa taxi sa dili pa kamo mosakay. Kon puyde inspeksiyonon una ang compartment. Time consuming na hinuon kini. Pero mas maayo gyod nga maneguro aron dili "mausahan" sa mga badlongon sa katilingban nga midagsang sa mga kalye sa siyudad.

* * *

(Sumbong ug reklamo? Text sa 0910-8105522. E-mail: [email protected].)