Lunop, baha ug hulga

Maayo ang awhag ni Konsehal Arsenio Pacaña nga pahimangnoan ang mga lumulopyo nga namuyo daplin sa kasapaan nga magbantay sa umaabot nga dagkong baha atol sa ting-uwan, paglunop ug ang pagdahili sa yuta.

Nindot paminawon nga dunay opisyal sa dakbayan nga nagpakabana alang sa kaayohan sa katawhan. Apan mas nindot g'yod unta kadto konsehal Pacaña kon ang imong gihimo mao ang pag-awhag sa DEPW nga palawman ang mga sapa.

Abi nimo konsehal, hapit tanan sa atong kasapaan karon - ilabi na ang sapa nga moagi diha sa barangay Lorega ug Zapatera ngadto na sa T. Padilla - kana bang gitawag og Sikatuna creek, dugay na kaayo nga wala kana'y limpyo-limpyo.

Ang mga namuyo sa maong lugar nahinumdom nga ang maong sapa nalimpyohan panahon pa sa administrasyon ni kanhi mayor Alvin Garcia. Sa ato pa, kapin na sa upat ka tuig ang milabay.

Unsaon man god kining mga opisyal nato sa DEPW nga mora man og nangatulog lang sa ilang katungdanan. Walay gihimo aron makuha ang mga nagliundok nga lapok, grabe ug mga sagbot nga maoy makaingon nga mosuyla ang tubig panahon sa pagbaha.

Dihay panahon nga mitawag gani g'yod ko sa DEPW apan giunya-unya lang hangtod nga nalimtan. Nakalimot na lang god ko sa engineer nga mitubag nako.

Apan bisan pa unta og walay reklamo, sila kay ila man kanang trabaho ang pagpalawom sa kasapaan, atimanon g'yod nila kanunay aron malikayan ang pagbaha kon dunay kusog nga uwan.

Unsay ikasulti nimo sa akong sugyot higalang Konsehal Pacaña? Nasayod ko nga dali rang makasabot kini si Konsehal Pacaña kay utokan ang maong opisyal.

* * *

Hangtud karon, ang mga sakop sa Lupong Tagapamayapa sa barangay Lorega-San Miguel wala pa makadawat sa ilang cash assistance gikan sa City Hall sukad niadtong Enero. Ambot, ang ubang mga barangay nakadawat na ba kaha ang ilang mga sakop sa Lupon?

Pipila ka sakop sa Lupon sa Lorega-San Miguel mihangyo nga tukion nato kining maong isyu.

Miadto ko sa opisina sa Liga ng mga Lupong Tagapamayapa sa dakbayan sa Sugbo nga ang opisina anaa mahimutang sa silong sa karaang City Hall.

Giingnan ko sa mga kawani sa maong opisina nga ang mga sakop sa Lupon sa Lorega-San Miguel dili kuno makadawat og cash assistance gikan sa City Hall kay dili kini sakop sa ilang kahugpungan.

Apan ang mga kawani sa accounting ug sa budget office sa City Hall namahayag nga dili tinuod ang pangangkon sa mga kawani sa Liga ng mga Lupong Tagapamayapa nga kadto rang ilang sakop ang makadawat og binipisyo.

* * *

Ha! Ha! Ha! Nakadawat na usab ko og text message nga nagpadayag og kasuko. Kini human nato gibakbakan pag-ayo ang naghitak nga illegal nga sugal nga masyaw.

Tulo ka text message ang akong nadawat. Kalooy sab tawon ninyo uy. Usbon nako, ayaw panghulga sa tawo nga dili mahadlok, adto lang sa uban.

Ayaw mo kasuko kon hisgutan nato ang illegal ninyo nga kalihukan. Kon inyo kana nga buhaton, mas mosamot pa ko paghisgut kay sa mohunong. Ipareho ko ninyo sa uban nga mahadlok. He! he! he!