EDITORYAL – Wa nay tsansa makabangon

Naunsa na man ning atong nasud. Dili lang ang natad sa politika ang nagkagubot, hasta na ron ang natad sa sports nagkaguliyang sab.

Tiaw mo bay ang Pilipinas dili na paapilon sa international tournaments a International Basketball Federation (FIBA) gumikan lang sa wala pagkasinabtanay sa Basketball Association of the Philippines (BAP) ug sa Philippine Olympics Committee (POC).

So, tungod niining panagbingkil tali sa BAP ug POC, nga pulos gipangulohan og politiko, giitsa puwersa na ang Pilipinas sa mga international basketball tournaments.

Naninguha man unta ang Pilipinas nga makabangon isip hari sa basketball sa Asya apan unsaon man pagbangon nga gidat-ogan man sa mga kunohay lider sa sports sa nasud ang kahigayonan nga ang nasud makabangon?

Nisugod na ang Southeast Asian Basketball Association (SEABA) tournament sa Kuala Lumpur apan wala sa cast ang Pinoy squad. Dako ra ba untang purohan nga masignit sa mga Pinoy ang kampyonato kay mga Southeast Asians ra man ang nanagduwa.

Kuyaw pa gani nga dili sab makaduwa ang RP sa SEA Games nga dinhi sa Pilipinas ipahigayon.

Kining kasamok tali sa mga kadagkoan sa atong sports bodies maoy nakabalda sa tinguha sa nasud nga makaangkon og dagkong kadungganan sa natad sa paugnat sa kusog sa kalibutan. Sayud ang katawhan niini. Ambot kun sayod ba sad ang mga nagmugna sa maong kasamok.