EDITORYAL - Ang baha sa siyudad

Ang City Council mimando sa Department of Engineering and Public Works sa paghimog halapad nga pagpanglimpyo sa mga kanal ug drainage system sa dakbayan niining pagsugod sa rainy season.

Ang maong kamanduan giluwatan sa Konseho human kaaprobahi niini ang resolusyon ni Konsehal Arsenio Pacana diin ang maong bulohaton gisugo.

Suma pa sa resolusyon ang mga buwan sa Hulyo ngadtos Disyembre maoy panahon sa ting-ulan dinhi sa ato ug kinahanglang limpiyohan ang mga kanal, estero, sapa, etc. aron dili kini mabara nga maoy hinungdan sa mga flashflood sa atong kadalanan ilabi na dinhi sa downtown area.

Mao ning atong kanunay madungog kada ting-ulan kada tuig. Limpiyohan ang mga kanal, estero, sapa, ug uban pang agianan sa tubig-ulan. Apan padayon ang baha. Mobaha basta dunay kusog nga ulan bisan dili panahon sa ting-ulan. Nakahatag og dakong kahasol sa katawhan ug kadaut sa negosyo.

Ambot kun duna pa bay kasulbaran kini nga problema sa baha dinhi sa atong siyudad. Mora man og gihimo na ang tanan sa kagamhanan aron masulbad ning maong suliran apan nagpabilin ra gihapon nga labad sa ulo kining maong problema.

Hangtud dili pa moabot ang tunhay nga kasulbaran ning problema sa baha ang maayo tingaling buhaton mao ang sugyot sa usa ka Sugbuanong enhinyero: "Let's live with the flood until the miracle solution comes."