Deployment sa Kuwait i-ban

HIHINTAYIN pa ba ng gobyerno na dumami ang mga inaabusong ‘‘unsung heroes’’ bago nito ipatigil ang deployment sa Kuwait!

Kamakalawa ng gabi, nakapanayam ng mga kuwago ng ORA MISMO, ang may 281 OFWs na dumating sa NAIA from Kuwait, nag-iiyakan ang halos lahat sa kanila dahil dumanas sila ng iba’t ibang uri ng pagmamaltrato hindi lamang sa mga amo nitong Arabo kundi maging sa mga malilibog na Kuwaiti police.

Nakauwi ang mga kababayan natin sa Pinas matapos ang isang mass repatriation sa Kuwait government.

Libre ang kanilang pamasahe matapos sagutin ng Kuwaiti government para makauwi ang ating mga OFWs.

Galit at poot ang ibinulalas ng ilang OFWs na nakulong sa iba’t ibang piitan sa Kuwait dahil sa pambababoy sa kanila ng mga Kuwait police.

Ilan sa kanila ay ginawang sex-slaves ng mga Kuwaiti policemen dahil inilalabas sila sa kulungan kung gabi para halayin.

Ang mga OFWs ay pawang naglayas sa kani-kanilang mga among Arabo kasi hindi nila makayanan ang hindi makataong pagtrato sa kanila.

Ang iba ay pinalad na makarating sa welfare office ng Pinas dito sila nagtago, samantalang ang ilan naman ay minalas at nahuli ng mga pigoy.

Isinumbong sa mga kuwago ng ORA MISMO, na marami pang Noypi workers ang nakakulong ngayon sa Kuwait.

Binatikos nila ang mga opisyal at kawani ng Consular Office ng Pilipinas sa Kuwait dahil daw sa kanilang kapabayaan kaya sila hindi kaagad nakabalik sa Pinas.

‘‘Kaya hindi pala sila nakauwi agad sa Pinas dahil ang iba sa mga kababayan natin ay walang passport,’’ anang kuwagong nagtitinda ng inihaw na mais.

‘‘Ganoon ba?’’

‘‘Karamihan din sa kanila ay undocumented workers,’’ sabi ng kuwagong Kotong cop.

‘‘Matindi ang sindikato ng recruitment maraming kababayan natin ang napapahamak,’’ anang kuwagong SPO-10 sa Crame.

‘‘Kailangan dito ang tulong ni Director Rey Jaylo ng PAIRTF.’’

Alam mo bang maraming Pinay ang namamatay sa Kuwait?’’ anang kuwagong haliparot.

‘‘Marami kasi ang undocumented workers kaya wala silang records sa Embassy.’’

"Sa hirap ng buhay kaya marami ang nagpapalusot papuntang Gitnang Silangan para magkaroon ng magandang trabaho at malaking sahod.’’

‘‘Ang problema napapahamak naman sila.’’

‘‘Iyan ang dapat tutukan ni Jaylo sa airport.’’

‘‘Mahihirapan si Jay-lo dahil wala siyang pondo.’’

‘‘Bakit naman?’’

‘‘Mahal ang pagkain sa NAIA.’’

‘‘Diyan palagay ko tama ka, kamote.’’