Itigil na ang paninisi sa kamatayan nina Martin at Ediborah

MARAMING paninisi sa militar ang aking naririnig tungkol sa pagkamatay ng Amerikanong hostage na si Martin Burnham at Pilipino nurse na si Ediborah Yap. Walang tigil sa kangangawa ng mga miron na ang tanging ginagawa ay humanap ng dahilan upang manira lang.

Hindi alam ng mga gagong ito kung ano ang gustong sabihin ng isang giyera. Kapag nahaharap ka sa isang mahigpit na combat lalo na sa kalagayan ng panahon at ang uri ng lugar ng battlefield, hindi maiiwasan na magkaroon ng mga casualties, maging sa tinutugis at ganoon din sa mga tumutugis. Sa kasamaang-palad nga lamang mayroon ding nabiktima at ang mga ito nga ay sina martin at Ediborah. Mahirap talagang iwasan ang ganitong pangyayari kahit na itanong pa sa mga eskperto.

Ilang miyembro lamang ng oposisyon at mangilan-ngilang kritiko ng administrasyon ang ayaw umunawa sa naganap na labanan ng militar at Abu Sayyaf noong June 7. Imbes na unawain at bigyan ng papuri ang kabayanihan ng ating mga sundalo sinisisi pa ang mga ito. Dapat siguro ay ang mga gunggong na naninira ang ilaban sa Abu Sayyaf!

Mismong si Gracia Burnham asawa ni Martin, ang paulit-ulit na nagsabi ng kanyang pagpuri sa militar at sa kagandahang loob ng mga Pilipino. Walang anumang negatibo o pasubali ang naririnig sa kanyang mga pahayag dito sa Pilipinas o sa pag-uwi niya sa Kansas. Si Gracia ay nasugatan sa rescue operation.

Tigilan na ang isyung sa rescue ng mga hostages. Ipagdasal na lang natin na manahimik na ang mga kaluluwa nina Martin at Ediborah. Ipanalangin din natin na masugpo na sa madaling panahon ang Abu Sayyaf at manumbalik ang katahimikan at kaunlaran sa Mindanao. Shalom.