Nag-rebond gipusil patay Decemay Padilla

CEBU, Philippines — Wala makatiwas sa pag rebond sa iyang kustomer ang usa ka 30-anyos nga bayot human kini gipusil diha sa Sitio Blk 5, Abellana Street, Barangay Suba, siyudad sa Sugbo, Miyerkules sa hapon, Enero 1, 2024.

Ang biktima mao si Allan Premacio, 30, taga Kabulan, Lungsod sa Buenavista, Probinsya sa Bohol.

Sa impormasyon sa Sawang Calero Police Station 6 Cebu City Police Office(CCPO) nag-rebond kini sa buhok sa iyahang higala sa dihang  usa ka wala mailhing lalaki ang niduo ug gipusil ang biktima sa wala nga bahin sa ulo niini nga maoy hinungdan sa iyang kamatayon.

Sa laing pagpamusil ug pagpanunggab,  usa ang patay ug laing duha ang grabeng naangol gabii sa Diyembre 31, 2024 sa Siyudad sa Lapu-Lapu , samtang laing tulo usab ang biktima sa pagpanunggab.

Si Police Captain Edcel Pelecio, Chief Public Information Officer (PIO)  sa Lapu-Lapu-City Police Office (PIO) sa press briefing ang unang pagpanuggab nahitabo sa merkado publiko sa Barangay Poblacion.

Namatay 25 anyos nga lalaki samtang grabeng naangol ang 26- anyos kauban niini nga parehong namaligya og pabuto. Matud pa nga dunay gisita ang namatay nga lalaking gidudahan niining asset sa mga polis, apan gibalikan sila niini nga nagdala na og kauban ug gitabang sila og dunggab dayon niikyas.

Sa pagpamusil nahitabo alas-10 ang takna sa gabii sa Disyembre 31, 2024 sa Barangay Buaya nalandig sa tambalanan ang tricycle driver nga kalit gipusil sa iyang nawong sa wala mailhing lalaki. Sa  alas 11 pasado ang takna sa gabii sa Disyembre 31,2024 laing pagpanunggab ang nahitabo sa Sitio Caimitohan sa Barangay Basak.

Ang biktima nga 42- anyos nga lalaki nga giingong ama-ama sa uyab nga babaye sa maong suspek nga nadakpan usab sa kapolisan sa Presinto 4 ug gitanggong na sa karsel. (BANAT NEWS)