Utok sa inhustisya
Taliwa sa pagmaniobra ni kanhi presidente Rodrigo Duterte sa tibuok makinarya sa gobyerno sa pagpapriso ni kanhi senador Leila de Lima, nga gipaundayonan sa administrasyon ni Presidente Ferdinand Marcos Jr., tulo ka huwes ang nangisog sa pagpakanaog sa makiangayong hukom sa mga ebidensiya sa prosekusyon:
• Nga ang gipresentar nga mga testimoniya ug ebidensiya wa momatuod sa gipasangil nga krimen sa pagnegosyo og ilegal nga drugas; ug
• Nga wa kapamatud-i ang gipasangil nga koneksiyon ni De Lima sa ilegal nga drugas sa New Bilibid Prison (NBP).
* * *
Niang tulo ka huwes nga wa mahudlat sa paugat sa prosecutors sa Department of Justice (DOJ) nilang Duterte ug Marcos:
• Muntinlupa Regional Trial Court (RTC) Branch 205 Judge Liezel Aquiatan ni-absuwelto sa unang kaso ni De Lima niadtong Pebrero 17, 2022;
• Muntinlupa RTC Branch 20 Judge Abraham Joseph Alcaranta ni-absuwelto ni De Lima sa ikaduhang kaso niadtong Mayo 12, 2023; ug
• Muntinlupa RTC Branch 206 Judge Gener Gito, nga naghupot sa ikatulong kaso, nitugot ni De Lima sa pag-piyansa para sa iyang temporaryong kagawasan niadtong Lunes, Nobyembre 13, 2023.
* * *
Nakumbinser ang mga huwes sa kahuyang sa mga ebidensiya batok ni De Lima dihang nagsunud-sunod og sibog ang mga saksi sa prosekusyon. Si Acquiatan nibasura sa kaso ni De Lima samtang nagtungkawo pa si Duterte sa Malacañang. Silang Alcantara ug Gito nipabor ni De Lima dihang wa na si Duterte sa gahom.
Imbes mobadlong, si Marcos nipadayon sa inhustisya batok ni De Lima. Mahimo untang sublion sa iyang DOJ ang mga kaso human nisibog ang mga testigo, pero gipalabi ang pag-ulug-ulog ni Duterte.
* * *
Kasagaran sa mga testigo nga nibakwi sa ilang pasangil niingon nga si kanhi Justice secretary Vitaliano Aguirre ug mga opisyal sa National Bureau of Investigation (NBI) ug Public Attorney’s Office (PAO) nihulga ug nisuburno nila.
Si kanhi Senate president Franklin Drilon niingon nga mahimong kasohan ang mga namugos sa mga saksi batok ni De Lima og subornation of perjury ubos sa Revised Penal Code. Nga nagtangag sa silot nga 10 ka tuig nga pagkapriso. Nahibawo tang tanan kinsay nagsugo ni Aguirre ug sa NBI ug PAO. Ug kinsay labing nagdumot ni De Lima.
- Latest
