Sandro Muhlach at NBI, naghain ng reklamo vs 2 independent contractors ng GMA

MANILA, Philippines — Pormal nang nagsampa ng reklamo ang aktor na si Sandro Muhlach at ang National Bureau of Investigation (NBI) laban sa dalawang indepen­dent contractors ng GMA Network sa Department of Justice (DOJ) kahapon.

Nabatid na si Muhlach, bilang private complainant, at ang NBI Public Corruption Division, ay naghain ng reklamong rape through sexual assault laban kina Jojo Nones at Richard Cruz.

Si Muhlach ay sinamahan ng kanyang amang si dating child actor Niño Muhlach, at ng NBI sa pagtungo sa DOJ sa Maynila, kung saan pinanumpaan niya ang kanyang reklamo laban sa mga respondents.

Kumpiyansa naman ang abogado ni Muhlach na si Atty. Czarina Raz, na malakas ang kanilang mga ebidensiya laban sa mga akusado.

Samantala, nagpasalamat si Niño sa mga taong sumusuporta sa laban ng kanyang anak.

Matatandaang una nang humarap sa pagdinig sa Senado sina Nones at Cruz at mariing pinabulaanan ang akusasyon ni Muhlach laban sa kanila.

Nagpahayag naman ng paniniwala si Muhlach na lalabas ang katotohanan at makakamit niya ang hustisya.