3rd spot kinuha ng Lady Spikers
MANILA, Philippines — Pinana ng De La Salle University ang solo third spot matapos katayin ang Far Eastern University, 25-17, 25-20, 25-22, sa UAAP Season 87 women’s volleyball tournament kahapon sa Smart Araneta Coliseum.
Nabulaga ng Lady Spikers ang Lady Tamaraws nang umarangkada sa opensa si Shevana Maria Nicola Laput na nagtala ng 22-point performance para ilista ang 5-2 karta ng Taft-based squad.
Maliban sa four-game winning streak ng La Salle ay napahaba rin nila ang pamamayagpag sa FEU na pitong sunod na nilang tinatalo simula noong Season 82.
Naghabol ng isang puntos ang Lady Spikers, 17-18, sa third set pero naging matikas ang laro ng 6-foot-2 na si Laput nang pumalo ng mga kills at krusyal block para agawin ang 22-19 bentahe sa Lady Tamaraws.
Nagtala si Alleiah Malaluan ng 12 points at may 10 markers si Angel Anne Canino, habang walo ang tinipa ni Amie Provido para sa La Salle.
Bumida si Faida Bakanke ng siyam na puntos at walo ang iniskor ni Gerzel Mary Pettalo para sa FEU na nalaglag ang baraha sa 4-3.
Samantala, napahirapan ang Ateneo de Manila University bago nailipad ang 20-25, 25-16, 22-25, 25-15, 15-13 panalo kontra University of the East sa unang laro.
- Latest
