Bank manager utas sa tandem
MANILA, Philippines - Patay ang isang manager ng banko matapos pagbabarilin ng riding in tandem habang sakay ng kanyang sasakyan ang una sa Caloocan City, kahapon ng umaga.
Dead on arrival sa Caloocan Medical Center sanhi ng 10 tama ng bala ng baril sa katawan ang biktimang si Davidson Pascual, manager ng Rural Bank sa Del Monte Avenue, Quezon City at residente ng Santos St., Navotas City.
Sa imbestigasyon ni SPO3 Joel Montebon, alas-10:15 ng umaga nang maganap ang insidente habang ang biktima ay lulan sa kanyang Toyota Innova at pagsapit sa panulukan ng 9th Avenue at P. Sevilla, isang kanto lang ang layo sa Police Assistance Center 6 ay doon hinarang at pinaulanan ng bala ng mga suspek.
Matapos ang insidente ay tumakas ang mga suspek na kapwa may takip sa mga mukha sakay ng motorsiklong hindi na nakuha ang plaka habang dinala naman ang biktima sa naturang ospital, subalit hindi na umabot nang buhay.
Nabatid pa kay Montebon, mga special bullet ang ginamit ng mga suspek. Hindi naman umano nakuha ang dalang pera ng nasawi na hindi pa batid kung magkano ang halaga dahil na rin sa pagdating ng mga pulis na nakatalaga sa PAC-6.
Inaalam na ng mga pulis kung pera ang pakay ng mga suspek o may kaugnayan sa pagiging manager nito sa banko.
- Latest
