1st year HS lusaw na, Grade 7 ipinalit!

MANILA, Philippines - Simula sa susunod na pasukan ay lusaw na ang 1st year high school na pasok ng mga estud­yante at lahat ng magtatapos sa grade 6 ngayon taon ay papasok sa grade 7 sa darating na pasukan.

Inihayag ni Fr. Gre­gorio “Gregg” Bañaga Jr., pre­sidente ng Adamson University at isa sa pa­ngunahing nagsusulong ng K to 12 program ng Department of Education (DepEd), na nagpatawag na siya ng pagpupulong sa lahat ng magulang na nasa grade 6 at ipina­alam ang nasabing plano ng DepEd.

“Wala na pong tata­ waging 1st year high school sa halip ay grade 7 na at sa susunod na mga taon ay grade 8, 9, 10, 11 at 12.” ani Fr. Gregg.

Si Fr. Gregg ay siya ring pangulo ng Catholic Educational Association of the Philippines o samahan ng lahat ng paaralan na pinatatakbo ng simbahang Katoliko.

Aniya, nasa ‘chronic illness­’ o naghihingalo na ang kalagayan ng edukasyon sa bansa kaya ka­­ilangan ng baguhin ang sistema ng pagtuturo sa mga estudyante para makasabay sa ‘global competition’.

Inihayag pa ni Fr. Gregg na may suporta naman ang pamahalaan sa mga mag-aaral sa mga pribadong paaralan sa pagpapatupad sa K to 12 kung saan ay P10,000 sa National Capital Region (NCR) at P5,000 na­man sa mga probinsiya habang libre sa mga pampublikong paaralan.

Tutol ang ilang magulang sa dagdag na dalawang taon na pag-aaral ng mga estudyante dahil panibago umanong pasa­nin sa kanila ang dagdag na gastos sa tuition fee at iba pang bayarin pero wala ng magagawa dahil sisimulan ng ipatupad ng DepEd ang K to 12 program nito sa darating na pasukan.