Pinay caregiver dinampot sa US

CALIFORNIA – Isang 51 anyos na caregiver na Pilipina ang inaresto dahil sa umano’y pagnanakaw ng pera mula sa anim na matatandang pasyente sa isang nursing home sa Berkeley dito sa United States.

Ayon sa isang report sa ABS-CBN, inaresto ng mga ahente ng California Department of Justice ang suspek na si Concepcion Giron, assistant administrator ng Elmwood Nursing and Rehabilitation Center, dahil sa pagnanakaw umano ng $50,000 mula sa mga pasyente.

Kinidnap pa umano ni Giron sa loob ng isang taon ang isang 85-anyos na pasyenteng may Alzheimer’s disease para makuha niya ang kanyang social security check at pension.

Sinabi ni California Attorney General Edmund Brown ng Bureau of Medi-Cal Fraud and Elder Abuse na tinanggap nila ang reklamo laban kay Giron noong 2009 at doon sila nagsimulang magsiyasat.

Ayon naman kay Terry McGregor, Executive Vice-President ng Elmwood Nursing and Rehabilitation Center, natuklasan nila ang problema sa resident funds at kagyat na sinuspinde si Giron na nagbitiw sa trabaho kinalaunan.

Nahaharap si Giron sa one count each of kidnapping to commit another crime, false imprisonment at elder abuse, at 6 counts of theft from elder by a caretaker.