Dayuhang nagtatrabaho sa Pinas dumarami

Lumobo umano ang bilang ng mga mangga­gawang dayuhan na nag­tatrabaho sa bansa mula Hunyo hanggang Nobyem­bre ng kasalukuyang taon kumpara sa parehong period noong 2006, pahayag kahapon ni Bureau of Immigration (BI) Commissioner Marcelino Libanan.

Sa rekord ng BI, tu­maas ng may 83 posiyento ang bilang ng mga expatriates o dayuhang mangga­gawa na nag-apply ng working visa sa bureau sa loob ng nasabing period kumpara noong nakaraang taon. 

Sa loob aniya ng nasa­bing mga buwan, umabot na sa may 3,400 dayuhan ang kanilang nabigyan o naisyuhan ng pre-arranged employment visas.

Sinabi rin ni Libanan na ang pagsirit ng nasabing bilang ay resulta lamang din ng pinaigting na kam­paya o crackdown ng bureau laban sa mga dayu­hang illegal na nagtatra­baho sa Pilipinas.

Kasabay nito, nilinaw naman ng BI chief na labag sa batas ang pagtatrabaho sa loob ng bansa ng isang dayuhan na walang ka­ukulang pahintulot ng pa­mahalaan. Layunin lamang naman umano ng nasa­bing batas na protektahan ang interes ng mga mang­gagawang Pilipino na manakawan ng hanapbu­hay o livelihood opportunities ng mga dayuhan.

Umapela rin naman si Libanan sa publiko na agad isumbong sa kaniyang tanggapan ang mga dayu­han na ilegal na nagta­trabaho sa loob ng bansa upang agad na maaresto at maipa-deport.  (Mer Lay­son)