3 kaso ng katiwalian vs Tsong isinampa

Isinampa na kahapon ng Office of the Ombudsman sa Sandiganbayan ang tatlong kaso ng katiwalian laban kay Parañaque Mayor Joey Marquez at tauhan nito kaugnay sa overprice na pagbili ng mga ito ng P2.079 milyon halaga ng mga bala at baril.

Ang kasong kriminal na kinakaharap nina Marquez at Ofelia Caunan, head ng General Services Office and Purchasing Officer ng Parañaque at ilang Jane Does ay nangyari noong 1996, 1997 at 1998.

Sa kasong isinampa, umabot sa P1.219 milyon ang overprice sa transaksiyon na hindi dumaan sa public bidding. Ang mga biniling bala at baril ay para sa mga pulis na nakatalaga sa Parañaque.

Inirekomenda ang P30,000 piyansa bawat isa para sa kanilang pansamantalang kalayaan. (Ulat ni Malou Rongalerios)