Mayor’s office kampiyon na sa Cebu City Hall Sportsfest
CEBU, Philippines – Nakadawat og sayong pinaskohan ang Mayor’s Office human sila mikampiyon sa Cebu City Hall Sportsfest 2014 basketball tournament niadtong Biyernes diha sa Cebu City Sports Institute (CCSI) gym sa Sawang Calero, ning siyudad.
Ang Mayor’s Office ubos ni Mayor Michael ‘Mike’ L. Rama mipilde sa karibal nilang City Treasurer’s Office, 119-105 aron sakmiton ang korona.
Si Mayor Rama mipasud og 13 ka three-pointers sa iyang kinatibuk-ang 49 puntos aron pangulohan ang Mayor’s Office nga milabaw og 11 puntos paghuman sa unang 10 minutos sa duwa, 34-23.
Nalahapan ang labaw ngadto na lang sa siyete puntos, 55-48 sa halftime dihang ang City Treasurer’s Office mi-rally sa pagpangulo ni Esperat, kinsa miiskor og 13 puntos sa second period. Milabaw pa ang City Treasurer’s Office pagtapos sa third quarter, apan si Mayor Rama mitusak og pito ka three-point shot sa final period aron ilogon pagbalik sa Mayor’s Office ang tiyempo sa duwa hangtod nga naangkon nila ang kahimayaan.
Si Mayor Rama nakakuha sab og dakung suporta gikan nilang Rene Toring ug Danny Aying nga mikutlo’g 20 ug 18 puntos matag usa.
Ang City Treasurer’s Office gipangulohan sab ni Esperata, kinsa mipabuhagay og 41 puntos, samtang laing duha niya ka teammates ang miiskor sab og double figures sa maong kapildihan. (BANAT NEWS)
- Latest
